spotnewswebsite@gmail.com
ചണ്ഡിഗഡ്∙ പഞ്ചാബിൽ ശിവസേന നേതാവിന്റെ വീട്ടിലെ കിടക്കയ്ക്ക് അടിയിൽ പൊലീസുകാരൻ ഹെറോയിൻ വയ്ക്കുന്നതിന്റെ വിഡിയോ ദൃശ്യങ്ങൾ പുറത്ത്. സംഭവം വിവാദമായതോടെ പൊലീസ് ഉദ്യോഗസ്ഥനെ സസ്പെൻഡ് ചെയ്യുകയും സംഭവത്തിൽ അന്വേഷണത്തിനായി പ്രത്യേക സംഘത്തെ രൂപീകരിക്കുകയും ചെയ്തു. പഞ്ചാബിലെ ലുധിയാന ജില്ലയിൽ ഖന്നയിലാണ് സംഭവം. ശിവസേന നേതാവ് മഹന്ത് കശ്മിർ ഗിരിയുടെ വീട്ടിൽ ലഹരി വയ്ക്കുന്നതിന്റെ ഒളിക്യാമറ ദൃശ്യങ്ങളാണ് പുറത്തുവന്നത്.
എഎസ്ഐ സുഖ്‍ദേവ് സിങ് സാധാരണ വേഷത്തിൽ മഹന്തിന്റെ വീട്ടിലേക്കു കയറുന്നതും എന്തൊക്കെയോ കിടക്കയ്ക്ക് അടിയിൽ വയ്ക്കുന്നതുമായി വിഡിയോയാണ് പുറത്തുവന്നത്. കുറച്ചു സമയത്തിനു ശേഷം പൊലീസ് സംഘം വീട്ടിലേക്ക് കയറി വരുന്നതും മുറിയിൽ പരിശോധന നടത്തുന്നതും വീട്ടിൽനിന്ന് 30 ഗ്രാം ഹെറോയിൻ കണ്ടെത്തുകയും ചെയ്തു. സംഭവത്തിൽ മഹന്ത് കശ്മിർ ഗിരി അറസ്റ്റിലായിരുന്നു. എന്നാൽ ഒളിക്യാമറ ദൃശ്യങ്ങൾ പുറത്തുവന്നതിനു പിന്നാലെ പൊലീസ് നടപടിയിൽ ചോദ്യങ്ങൾ ഉയരുന്നുണ്ട്.
പൊലീസ് സംഘം പരിശോധനയ്ക്കായി വീട്ടിൽ എത്തുന്നതിനു മുൻപ് സുഖ്‍ദേവ് സിങ് അവിടെ എത്തിയതായാണ് റിപ്പോർട്ടുകൾ പറയുന്നത്. ഏഴര ഗ്രാം ഹെറോയിനുമായി മഹന്തിന്റെ ഡ്രൈവർ ഗുർജന്ത് സിങ്ങിനെ അറസ്റ്റ് ചെയ്തതാണ് സംഭവങ്ങളുടെ തുടക്കും. ഗുർജന്തിന്റെ ചോദ്യം ചെയ്യുന്നതിനിടെ മഹന്തിന്റെ പേര് പരാമർശിക്കുകയും അതേത്തുടർന്ന് പരിശോധന നടത്തുകയുമായിരുന്നു. മഹന്തിനെ പൊലീസ് കേസിൽനിന്ന് ഒഴിവാക്കി.
