ഗുർദാസ്പൂർ∙ പഞ്ചാബിലെ ഗുർദാസ്പൂർ ജില്ലയിൽ സ്വത്ത് തർക്കത്തെ തുടർന്ന് സൈനികനെ അമ്മയും സഹോദരനും ബന്ധുക്കളും ചേർന്ന് മർദിച്ചു. ഗുർദാസ്പൂരിലെ സൈൻപുർ അബ്ബൽ ഖൈർ ഗ്രാമത്തിലാണ് സംഭവം. അവധിക്ക് നാട്ടിലെത്തിയ വസീർ സിങ്ങിനാണ് മർദനമേറ്റത്.

 

വസീറിന്റെ കൃഷിഭൂമി സഹോദരങ്ങൾ അനധികൃതമായി കൈയ്യേറിയതുമായി ബന്ധപ്പെട്ട് തർക്കം നിലനിന്നിരുന്നു. ഈ പ്രശ്നം പറഞ്ഞുതീർക്കാനെന്ന വ്യാജേനെ ബന്ധുക്കൾ വസീറിനെ ഇയാളുടെ കടയ്ക്ക് സമീപത്തേക്ക് വിളിച്ചുവരുത്തി. വാഹനത്തിൽ നിന്നിറങ്ങിയ ഉടൻ തന്നെ ബന്ധുക്കൾ വസീറിനെ വളഞ്ഞിട്ട് ആക്രമിക്കാൻ തുടങ്ങിയെന്നും വിവരമറിഞ്ഞ് സ്ഥലത്തേക്ക് ഓടിയെത്തിയ തന്നെയും അവർ മർദിച്ചെന്നും വസീറിന്റെ ഭാര്യ സൈനി പറഞ്ഞു. ഇതിനിടെ സൈനി മർദന ദൃശ്യങ്ങൾ ഫോണിൽ പകർത്തിയിരുന്നു.

 

മർദനത്തിൽ ഗുരുതരമായി പരുക്കേറ്റ വസീറിനെ ഉടൻ തന്നെ ഗുർദാസ്പൂരിലെ സർക്കാർ ആശുപത്രിയിൽ പ്രവേശിപ്പിച്ചു. എന്നാൽ ഡോക്ടർ ഭർത്താവിന് കൃത്യമായ ചികിത്സ നൽകിയില്ലെന്ന് സൈനി ആരോപിച്ചു. പ്രതികളുമായി ഡോക്ടർ ഒത്തുകളിക്കുകയാണെന്നും ഭർത്താവിന്റെ ജീവൻ അവിടെ സുരക്ഷിതമല്ലെന്നും അതുകൊണ്ട് വീട്ടിലേക്ക് കൊണ്ടുവന്നെന്നും സൈനി പറഞ്ഞു. ബന്ധുക്കളിൽ നിന്ന് ഇപ്പോഴും വധഭീഷണിയുണ്ടെന്നും ഭയം കാരണം വീടിന് പുറത്തിറങ്ങാൻ പോലും സാധിക്കാത്ത അവസ്ഥയിലാണെന്നും അവർ പറഞ്ഞു. സംഭവത്തിൽ പൊലീസ് കേസ് റജിസ്റ്റർ ചെയ്ത് അന്വേഷണം തുടങ്ങി.