ചങ്ങനാശേരി ∙ ചങ്ങനാശേരി ടൗണിലും പൊലീസ് സ്റ്റേഷനിലും ഭീകരാന്തരീക്ഷം സൃഷ്ടിച്ച് അക്രമം അഴിച്ചുവിട്ട സംഘം അറസ്റ്റിൽ. കോട്ടയം ജില്ലയിലെ പ്രധാന ഗുണ്ടകളും നിരവധി ക്രിമിനൽ കേസുകളിലെ പ്രതികളുമായ സാജു ജോജോ, മിഥുൻ തോമസ്, ഇവർക്കൊപ്പം അക്രമത്തിൽ പങ്കാളിയായ അഭിഭാഷകൻ ജുബിൻ എന്നിവരാണ് ചങ്ങനാശേരി പൊലീസിന്റെ പിടിയിലായത്.

 

തിങ്കളാഴ്ച രാത്രി ചങ്ങനാശേരിയിലെ ബാറിൽ അക്രമം അഴിച്ചുവിട്ട സംഘം, മുനിസിപ്പൽ ആർക്കേഡിലെത്തി മൊബൈൽ ഷോപ്പിലെ ജീവനക്കാരെ അസഭ്യം പറയുകയും മാരകായുധങ്ങൾ ഉപയോഗിച്ച് ഉപദ്രവിക്കുകയും ചെയ്തു. കടയിലെ സാധനങ്ങളും ഫോണുകളും അടിച്ചുതകർത്തു. പിടികൂടാൻ ശ്രമിക്കുന്നതിനിടെ, എസ്ഐ അജിത് കുമാർ, സിപിഒ റിജോമോൻ, എന്നിവരെ ആക്രമിച്ചു. തുടർന്ന് കൂടുതൽ പൊലീസ് സംഘമെത്തി സാഹസികമായാണ് പ്രതികളെ കീഴടക്കി സ്റ്റേഷനിൽ എത്തിച്ചത്. സ്റ്റേഷനിലെത്തിയ പ്രതികൾ അവിടെയും അക്രമം തുടരുകയും ഒരു രാത്രി മുഴുവൻ ഭീകരാന്തരീക്ഷം സൃഷ്ടിക്കുകയും ചെയ്തു. സ്റ്റേഷനിലെ ഉപകരണങ്ങൾ അടിച്ചുതകർത്തു. ഡ്യൂട്ടിയിലുണ്ടായിരുന്ന എസ്ഐ റെയ്നോൾഡ്, സിപിഒ ദിലീപ് ചെല്ലം എന്നിവരെ ആക്രമിച്ചു പരുക്കേൽപിച്ചു.

 

ഒരു മാസം മുൻപ് പ്രതികൾ മുനിസിപ്പൽ ആർക്കേഡിലെത്തി മൊബൈൽ ഷോപ്പിലെത്തി ജീവനക്കാരെ വടിവാൾ വീശി ഭീകരാന്തരീക്ഷം സൃഷ്ടിച്ചിരുന്നു. അന്ന് പ്രതികളെ പൊലീസ് അറസ്റ്റ് ചെയ്തെങ്കിലും ജാമ്യം ലഭിച്ചു. ജില്ലയിലും സമീപ ജില്ലകളിലെ വിവിധ സ്റ്റേഷനുകളിലായി 30ലധികം ക്രിമിനൽ കേസുകളിൽ പ്രതികളായ സാജു ജോജോ, മിഥുൻ തോമസ് എന്നിവർ കാപ്പ നിയമപ്രകാരം പല തവണ ശിക്ഷ അനുഭവിച്ചിട്ടുള്ളവരാണ്. ചങ്ങനാശേരി ഡിവൈഎസ്പി അഷാദിന്റെ നേതൃത്വത്തിൽ സിഐ അനിൽ ജോർജ്, എസ്ഐ അഖിൽ വിജയകുമാർ, എഎസ്ഐ ആശ, എഎസ്ഐ സെയ്നി സെബാസ്റ്റ്യൻ, എസിപിഒ അനീഷ്, സിപിഒ സതീഷ്, സിപിഒ പ്രവീൺ, സിപിഒ ജോസഫ് എന്നിവരടങ്ങിയ പ്രത്യേക അന്വേഷണ സംഘമാണ് പ്രതികളെ അറസ്റ്റ് ചെയ്തത്. പ്രതികളെ കോടതിയിൽ ഹാജരാക്കി റിമാൻഡ് ചെയ്തു.