കൊച്ചി ∙ ക്ഷേത്രങ്ങളിലെ കൊടിമരം മാറ്റി സ്ഥാപിക്കുന്നത് ഉൾപ്പെടെ ആചാരപരമായ ചടങ്ങുകൾക്ക് ശേഷം മാറ്റപ്പെടുന്ന വാജിവാഹനങ്ങളും മറ്റു ലോഹവസ്തുക്കളും തന്ത്രിമാർക്ക് അവകാശപ്പെട്ടതാണെന്ന് കരുതാനാകില്ലെന്ന് ഹൈക്കോടതി. ദൈവത്തിനായി സമർപ്പിക്കപ്പെടുന്ന സ്വത്തുക്കൾ ദേവതയുടേതാണെന്നും പൂജാകർമങ്ങൾ നിർവഹിക്കുന്നു എന്നതുകൊണ്ട് മാത്രം തന്ത്രിമാർക്ക് അതിൽ യാതൊരുവിധ ഉടമസ്ഥാവകാശവും ലഭിക്കുന്നില്ലെന്നും കോടതി വ്യക്തമാക്കി. അഖില തന്ത്രി പ്രചാരക സഭയുടെ ഭാരവാഹികള്‍ നൽകിയ റിട്ട് ഹർജി തള്ളിക്കൊണ്ടാണ് ജസ്റ്റിസുമാരായ രാജ വിജയരാഘവൻ, കെ.വി. ജയകുമാർ എന്നിവരുൾപ്പെട്ട ദേവസ്വം ബെഞ്ചിന്റെ വിധി.

 

പഴയ കൊടിമരം മാറ്റി പുതിയത് സ്ഥാപിക്കുമ്പോൾ അതിനുമുകളിൽ ഉണ്ടായിരുന്ന ദൈവത്തിന്റെ ‘വാഹനം’ പോലുള്ള ലോഹവസ്തുക്കൾ തന്ത്രിക്ക് ദാനമായോ അല്ലാതെയോ ലഭിക്കാൻ അർഹതയുണ്ടെന്നായിരുന്നു ഹർജിക്കാർ വാദിച്ചത്. ‘തന്ത്രസമുച്ചയം’ എന്ന ആചാരഗ്രന്ഥത്തിലെ വിധിപ്രകാരമുള്ള ഈ പാരമ്പര്യ അവകാശം തടയാൻ ദേവസ്വം ബോർഡിന് അധികാരമില്ലെന്നും അവർ വാദിച്ചു. 2012ൽ ദേവസ്വം കമ്മിഷണർ പുറത്തിറക്കിയ സർക്കുലർ പ്രകാരം ഇത്തരം വസ്തുക്കൾ ദേവസ്വത്തിന്റെ സ്വത്തായി നിലനിർത്തണമെന്ന് വ്യവസ്ഥ ചെയ്യുന്നതിനെതിരെയായിരുന്നു ഹർജി.

 

എന്നാൽ, തന്ത്രിമാരുടെ സംഘടനയുടെ നിവേദനം പരിഗണിച്ചാണ് 2012ൽ ഈ സർക്കുലർ പുറത്തിറക്കിയതെന്ന് ദേവസ്വം ബോർഡ് കോടതിയെ അറിയിച്ചു. ദേവചൈതന്യം എടുത്തുമാറ്റിയ ഭൗതിക വസ്തുക്കൾ പൊതുസ്വത്തായതിനാൽ അവ ദേവസ്വത്തിന്റെ സ്വത്തായി സൂക്ഷിക്കണമെന്നാണ് ദേവസ്വം മാന്വൽ വ്യവസ്ഥ ചെയ്യുന്നത്.