ചെന്നൈ ∙ ഏറെ അനിശ്ചിതത്വത്തിനു ശേഷം തമിഴ്നാട് മുഖ്യമന്ത്രി വിജയ് നായകനായ ജനനായകൻ റിലീസാകാൻ ദിവസങ്ങൾ മാത്രം ശേഷിക്കേ ഓവർ ടൈം പണിയെടുത്ത് തിരുപ്പൂരിലെ വസ്ത്രനിർമാണ യൂണിറ്റുകൾ. വിജയ് ഫാൻസിനു വേണ്ടിയുള്ള പ്രത്യേക ടി-ഷർട്ടുകൾ തുന്നുന്ന തിരക്കിലാണ് ഇവർ. വർധിച്ച ആവശ്യം പൂർത്തീകരിക്കുന്നതിനായി യൂണിറ്റുകൾ 24 മണിക്കൂറും പ്രവർത്തിക്കുകയാണ്.

 

സെൻസർ ബോർഡുമായുള്ള തർക്കങ്ങളും കോടതി വ്യവഹാരങ്ങളും കടന്നാണ് ജനനായകൻ റിലീസിനെത്തുന്നത്. ചിത്രം പെട്ടിയിൽ തുടർന്നപ്പോൾ വിജയ് സിനിമാ താരത്തിൽനിന്നും തമിഴ്നാട് മുഖ്യമന്ത്രിയായി മാറുകയും ചെയ്തു. ജൂലൈ 23 നാണ് ചിത്രം തിയറ്ററിൽ എത്തുന്നത്. വിജയുടെ ചിത്രവും സിനിമയുടെ പേരും ഉൾപ്പെടുത്തിയുള്ള ഷർട്ടുകൾക്കാണ് ഫാൻസ് യൂണിറ്റുകൾ ഓർഡർ നൽകിയിട്ടുള്ളത്.

 

മുൻപും ഫാൻസിന്റെ ഇത്തരം ആവശ്യങ്ങൾ നിറവേറ്റിയിട്ടുണ്ടെങ്കിലും ഇത്തവണ വലിയ ഓർഡറാണ് ലഭിച്ചതെന്ന് തിരുപ്പൂരിലെ വസ്ത്ര നിർമാതാക്കൾ പറയുന്നു. കേരളം അടക്കമുള്ള സംസ്ഥാനങ്ങളിൽനിന്നും ഇവിടേക്ക് ജനനായകൻ ഓർഡറുകൾ ലഭിക്കുന്നുണ്ട്.