മയാമി∙ യുഎസിലെ മയാമി രാജ്യാന്തര വിമാനത്തിൽ ആമസോണിന്റെ കാർഗോ വിമാനം തകർന്ന് 5 മരണം. 5 പേർക്ക് പരുക്ക്. ഇതിൽ മൂന്നുപേരുടെ നില ഗുരുതരമാണ്. പോർട്ടറീക്കോയിലെ സാൻ ഹ്വാനിൽനിന്ന് മയാമിയിലേക്ക് വന്ന ബോയിങ് 767 വിമാനമാണ് അപകടത്തിൽപ്പെട്ടത്. റൺവേയിൽനിന്ന് തെന്നിമാറിയ വിമാനം സമീപം പാർക്കു ചെയ്തിരുന്ന വാഹനങ്ങളിലേക്ക് ഇടിച്ചുകയറിയ ശേഷം തീപിടിക്കുകയായിരുന്നു. വിമാനം അപകടത്തിൽപ്പെടുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്.

 

വിമാനം ഇടിച്ച വാഹനങ്ങൾക്ക് ഉള്ളിലുണ്ടായിരുന്നവരും പരുക്കേറ്റവരിൽ ഉൾപ്പെടുന്നുവെന്ന് മയാമി ഡെയ്ഡ് കൗണ്ടി അഗ്നിരക്ഷാ മേധാവി റേ ജദല്ല മാധ്യമങ്ങളോടു പറഞ്ഞു.

 

സംഭവത്തിൽ നാഷണൽ ട്രാൻസ്പോർട്ടേഷൻ സേഫ്റ്റി ബോർഡ് (എൻടിഎസ്ബി) അന്വേഷണം ആരംഭിച്ചതായും ജദല്ല പറഞ്ഞു. അപകടത്തിന്റെ കാരണം ഫെഡറൽ ഏവിയേഷൻ അഡ്മിനിസ്ട്രേഷനും എൻടിഎസ്ബിയും നടത്തുന്ന അന്വേഷണത്തിൽ കണ്ടെത്തുമെന്നും അദ്ദേഹം കൂട്ടിച്ചേർത്തു.