പത്തനംതിട്ട∙ ജനറൽ ആശുപത്രിയിൽനിന്ന് രോഗിക്കു നൽകിയ ഗുളിക പൊട്ടിച്ചപ്പോൾ കുഴമ്പു രൂപത്തിലെന്നു പരാതി. ഇലന്തൂർ സ്വദേശി സുനിൽ കുമാറാണു ആശുപത്രി സൂപ്രണ്ടിനു പരാതി നൽകിയത്. കഴിഞ്ഞ 27നു ശാരീരിക പ്രശ്നങ്ങളെ തുടർന്ന് ആശുപത്രിയിൽ എത്തി ഡോക്ടറെ കണ്ടിരുന്നു. അപ്പോൾ കുറിച്ചു നൽകിയ മരുന്ന് ആശുപത്രി ഫാർമസിയിൽനിന്നു വാങ്ങി. ഇതിൽ ഒന്നു കഴിക്കുകയും ബാക്കി സൂക്ഷിക്കുകയും ചെയ്തു.

 

കഴിഞ്ഞ ദിവസം അതിൽ ഒരെണ്ണം കഴിക്കാൻ അലുമിനിയം ഫോയിൽ കീറിയപ്പോഴാണു ഗുളിക കുഴമ്പു രൂപത്തിൽ കണ്ടതെന്നാണു ആരോപണം. പരാതിയിൽ കഴമ്പില്ലെന്നും ഗുളിക ശരിയായ രീതിയിൽ സൂക്ഷിക്കാതിരുന്നതിനാലാണു ഇങ്ങനെ സംഭവിച്ചതെന്നും ആശുപത്രി അധികൃതർ പറഞ്ഞു. 2027 വരെ കാലാവധിയുള്ള ഈ ബാച്ച് ഗുളിക മറ്റു പലർക്കും നൽകിയെങ്കിലും ആരും പരാതി ഇതുവരെ ഉന്നയിച്ചിട്ടില്ല. ശരിയായ തരത്തിൽ ഗുളിക സൂക്ഷിച്ചിരുന്നെങ്കിൽ ഇങ്ങനെ ഉണ്ടാകില്ലായിരുന്നു എന്നും അധികൃതർ‍ പറഞ്ഞു.