കോഴിക്കോട് ∙ മാരക ലഹരിമരുന്നായ എംഡിഎംഎയുമായി യുവാവ് പിടിയിൽ. നല്ലളം വെസ്റ്റ് ബസാർ സ്വദേശി എൻ.പി. ഹർഷാദിനെ (30) ആണ് നല്ലളം സ്റ്റേഷൻ സബ് ഇൻസ്പെക്ടർ വി.ആർ. അരുണിന്റെ നേതൃത്വത്തിലുള്ള നല്ലളം പൊലീസും കോഴിക്കോട് സിറ്റി ഡാൻസാഫും ചേർന്ന് പിടികൂടിയത്.

 

ഡാൻസാഫിനു ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് 10 ഗ്രാം എംഡിഎംഎയുമായി ഇയാൾ പിടിയിലാകുന്നത്. പ്രതിക്ക് മറ്റ് ലഹരി ഇടപാടുകളോ കേസോ ഉണ്ടോയെന്ന് പൊലീസ് വിശദമായി അന്വേഷിച്ചു വരികയാണ്. ലഹരിമരുന്ന് കടത്തിനെതിരെയുള്ള അന്വേഷണം കൂടുതൽ ശക്തമാക്കുമെന്നും ലഹരി ശൃംഖലയിലെ മറ്റു കണ്ണികളെക്കുറിച്ചുള്ള വിവരങ്ങൾ ശേഖരിച്ചു വരികയാണെന്നും പൊലീസ് അറിയിച്ചു.

 

ഓപ്പറേഷൻ തൂഫാന്റെ ഭാഗമായി കോഴിക്കോട് സിറ്റി പരിധിയിൽ ശക്തമായ പരിശോധനയാണ് പൊലീസ് നടത്തിവരുന്നത്. കഴിഞ്ഞദിവസം നടുവണ്ണൂർ സ്വദേശി ധനുസിനെ 24 ഗ്രാം ഹഷീഷ് ഓയിലുമായി ഡാൻസാഫ് പിടികൂടി മെഡിക്കൽ കോളജ് പൊലീസിന് കൈമാറിയിരുന്നു. നല്ലളം സബ് ഇൻസ്പെക്ടർ മുഹമ്മദ് ഫൈറൂസ്, അനു അജ്രം, സിവിൽ പൊലീസ് ഓഫിസർമാരായ അരവിന്ദ്, സുനീഷ് ഡാൻസാഫ് എസ്ഐ മനോജ് ഇടയേടത്ത്, എഎസ്ഐ കെ.അഖിലേഷ്, സിവിൽ പൊലീസ് ഓഫിസർമാരായ സരുൺ, ശ്രീശാന്ത്, തൗഫീഖ്, അതുൽ, അഭിജിത്ത്, ദിനീഷ്, മുഹമ്മദ് മഷ്ഹൂർ എന്നിവരാണ് അന്വേഷണ സംഘത്തിൽ ഉണ്ടായിരുന്നത്.