കൽപറ്റ ∙ മുണ്ടക്കൈ – ചൂരൽമല ഉരുൾപൊട്ടൽ ദുരന്തബാധിതർക്കായി നിർമിക്കുന്ന ടൗൺഷിപ്പിൽ വ്യാപാരകേന്ദ്രങ്ങളുടെ നിർമാണം അവസാനഘട്ടത്തിലേക്ക്. കോൺക്രീറ്റ്, പെയിന്റിങ് ജോലികളാണ് ഇനി അവശേഷിക്കുന്നത്. ആശുപത്രി കെട്ടിടത്തിന്റെ നിർമാണവും വേഗത്തിൽ നീങ്ങുന്നു. പുതുവത്സരത്തിനു മുൻപായി ഇവ രണ്ടിന്റെയും നിർമാണം പൂർത്തിയാകുമെന്നു ടൗൺഷിപ്പ് അധികൃതർ അറിയിച്ചു. ടൗൺഷിപ്പിൽ വിഭാവനം ചെയ്തിരിക്കുന്ന സ്കൂൾ, പരേഡ് ഗ്രൗണ്ട് എന്നിവയുടെ നിർമാണം ഉടൻ ആരംഭിക്കില്ല.

 

ആദ്യ പരിഗണന വീടുകൾക്കാണെന്നും ഒക്ടോബറോടെ ടൗൺഷിപ്പിലെ എല്ലാ വീടുകളും പൂർത്തീകരിക്കുമെന്നും അധികൃതർ പറയുന്നു. നിലവിൽ ക്ലസ്റ്റർ അഞ്ചിലെ വീടുകളുടെ പണിയാണ് പൂർത്തിയാക്കുന്നത്. വിവിധ ക്ലസ്റ്ററുകളിലായി 157 വീടുകളുടെ നിർമാണം പുരോഗമിക്കുന്നു. ഇതിൽ 149 ഗുണഭോക്താക്കളുണ്ട്. സർക്കാർ ഗുണഭോക്താക്കളുടെ അന്തിമ ലിസ്റ്റ് പ്രസിദ്ധീകരിക്കുമ്പോൾ കൈമാറാനായി 8 വീടുകൾ അധികം കൂടി നിർമിക്കുന്നു.നിലവിൽ പെട്ടെന്ന് കൈമാറേണ്ട 149 വീടുകളുടെ പെയ്ന്റിങ് പണിയാണ് പുരോഗമിക്കുന്നത്. ഒക്ടോബർ 31 ഓടെ ഇത് പൂർത്തീകരിക്കും. നവംബറോടെ നറുക്കെടുപ്പ് നടത്തി വീടുകൾ കൈമാറാനാകുമെന്നാണു പ്രതീക്ഷ.