പാരിസ്∙ ഫ്രാൻസിൽ വിദ്യാർഥി പ്രക്ഷോഭം കനത്ത അക്രമ പരമ്പരയായി മാറുന്നു. സ്കൂളുകളിലെ ഫണ്ട് വെട്ടിക്കുറച്ചതിനെതിരെയുണ്ടായ വിദ്യാർഥി സമരം ഇപ്പോൾ രാജ്യവ്യാപകമായി കടുത്ത അരാജകത്വത്തിലേക്കാണ് വഴിമാറിയിരിക്കുന്നത്. പ്രക്ഷോഭകാരികളുടെ അക്രമങ്ങളിൽ പൊലീസും സാധാരണക്കാരും ഒരുപോലെ വലയുകയാണെന്നാണ് റിപ്പോർട്ടുകൾ.

 

പെട്രോൾ ബോംബ് ആക്രമണങ്ങളും തീവയ്പ്പുകളും തെരുവിലെ ആക്രമണങ്ങളും കാരണം ഫ്രഞ്ച് നഗരങ്ങളിൽ ക്രമസമാധാനം പ്രതിസന്ധിയിലാണ്. പലയിടത്തും അക്രമം നിയന്ത്രിക്കാനാവാതെ പൊലീസ് ബുദ്ധിമുട്ടുകയാണ്.

 

തലസ്ഥാനമായ പാരിസിൽ ഡ്യൂട്ടിക്കിടെ പൊലീസുദ്യോഗസ്ഥയെ വളഞ്ഞിട്ട് ആക്രമിച്ച ആൾക്കൂട്ടം ‘അവളെ കൊന്നുകളയൂ’ എന്ന് ആക്രോശിച്ചത് വലിയ നടുക്കമാണ് സൃഷ്ടിച്ചിരിക്കുന്നത്. ഇതിനിടെ മാഴ്സെയിൽ സ്കൂൾ പ്രിൻസിപ്പലിന്റെയും ഡെപ്യൂട്ടി പ്രിൻസിപ്പലിന്റെയും മേൽ പെട്രോൾ ഒഴിച്ച് തീവയ്ക്കാൻ ശ്രമിച്ചതായും റിപ്പോർട്ടുകളുണ്ട്.

 

സാധാരണക്കാരായ വിദ്യാർഥികളുടെ പ്രതിഷേധം പിന്നീട് തീവ്ര ഇടതുപക്ഷ ഗ്രൂപ്പുകളും പ്രശ്നബാധിത പ്രദേശങ്ങളിൽ നിന്നുള്ള അക്രമികളും ചേർന്ന് ഹൈജാക്ക് ചെയ്യുകയായിരുന്നുവെന്നാണ് റിപ്പോർട്ട്. സ്ഥിതിഗതികൾ ഗുരുതരമായതിനെ തുടർന്ന് വിദ്യാർഥികൾ സുരക്ഷിതരായിരിക്കാനും അക്രമങ്ങളിൽ നിന്ന് വിട്ടുനിൽക്കാനും ജാഗ്രതാ നിർദ്ദേശം നൽകിയിരിക്കുകയാണ് ഫ്രഞ്ച് നാഷനൽ പൊലീസ്.