ന്യൂഡൽഹി∙ ലൈംഗിക പീഡന ആരോപണത്തിന് പിന്നാലെ ജവഹർലാൽ നെഹ്റു സർവകലാശാല പ്രഫസറും കോണ്‍ഗ്രസ് എംപിയുമായ അങ്ഗോംച ബിമോൽ അകോയിജാമിനെ പിരിച്ചുവിട്ടു. സർവകലാശാലയുടെ ആഭ്യന്തര സമിതിയുടെ അന്വേഷണത്തിന് പിന്നാലെയാണ് നടപടി. ഇക്കാര്യം വ്യക്തമാക്കിക്കൊണ്ട് ജെഎൻയു വൈസ് ചാൻസലർ ശാന്തിശ്രീ ഡി. പണ്ഡിറ്റ് ഒപ്പിട്ട ഉത്തരവും പുറത്തുവന്നു.

 

ആഭ്യന്തര സമിതിയുടെ കണ്ടെത്തലുകളുടെ അടിസ്ഥാനത്തിൽ പ്രഫസറിനെതിരെ കർശന ശിക്ഷ ശുപാർശ ചെയ്തെന്നും സർവകലാശാല അറിയിച്ചു. നിയമപരമായ നടപടിക്രമങ്ങൾ പാലിച്ചും ലഭ്യമായ എല്ലാ വസ്തുതകളും പരിശോധിച്ചാണ് അങ്ഗോംചയെ പിരിച്ചുവിടാൻ തീരുമാനിച്ചതെന്ന് ഉത്തരവിൽ പറയുന്നു.

 

അങ്ഗോംചയ്ക്കെതിരെ 11 വിദ്യാർഥികളാണ് ലൈംഗിക പീഡന പരാതി നൽകിയത്. വിദ്യാർഥികളുടെ പരാതിയിൽ നടപടി ആവശ്യപ്പെട്ട് എബിവിപിയാണ് ആദ്യം രംഗത്തെത്തിയത്. 4 മാസം മുൻപ് കോളജിലെ ആഭ്യന്തര സമിതിക്ക് പരാതി സമർപ്പിച്ചെങ്കിലും നടപടിയെടുക്കാൻ വൈകിയതിൽ എബിവിപി വിമർശനം ഉന്നയിച്ചിരുന്നു.

 

എന്നാൽ തനിക്കെതിരായ ആരോപണങ്ങൾ അങ്ഗോംച തള്ളിക്കളഞ്ഞിരുന്നു. തന്റെ സൽപ്പേരിന് കളങ്കം വരുത്താനാണ് പരാതിയിലൂടെ ശ്രമിച്ചതെന്ന് അദ്ദേഹം വ്യക്തമാക്കിയിരുന്നു. ജെഎൻയുവിലെ സ്കൂൾ ഓഫ് സോഷ്യൽ സയൻസസിലെ സെന്റർ ഫോർ ദി സ്റ്റഡി ഓഫ് സോഷ്യൽ സിസ്റ്റംസിൽ അധ്യാപകനായിരുന്നു അങ്ഗോംച. 2024–ൽ കോൺഗ്രസ് ടിക്കറ്റിൽ മണിപ്പൂരിലെ ഇന്നർ മണിപ്പൂർ മണ്ഡലത്തിൽ നിന്ന് അദ്ദേഹം ലോക്സഭയിലേക്ക് തിരഞ്ഞെടുക്കപ്പെട്ടു.