ന്യൂഡൽഹി: തലസ്ഥാനത്ത് സമാധാനപരമായി ഒത്തുകൂടുന്ന പ്രതിഷേധക്കാരെ പൊലീസ് അനധികൃതമായി തടങ്കലിൽ വെക്കാൻ പാടില്ലെന്ന് സുപ്രീം കോടതി. കോക്രോച്ച് ജനതാ പാർട്ടിയുടെയും (സിജെപി) പ്രതിപക്ഷ കക്ഷികളുടെയും പ്രതിഷേധങ്ങളുടെ പശ്ചാത്തലത്തിൽ ഡൽഹിയിലെ മെട്രോ സ്റ്റേഷനുകൾ അടച്ചിട്ടതിനും കടുത്ത നിയന്ത്രണങ്ങൾ ഏർപ്പെടുത്തിയതിനുമെതിരായ ഹർജികൾ പരിഗണിക്കാൻ ഞായറാഴ്ച ചേർന്ന പ്രത്യേക സിറ്റിങ്ങിലാണ് സുപ്രീം കോടതിയുടെ നിർണ്ണായക ഇടപെടൽ. പൗരന്മാർക്ക് പ്രതിഷേധിക്കാൻ മൗലികാവകാശമുണ്ടെന്നും എന്നാൽ അത് പൊലീസ് ആക്ടിന്റെ ചട്ടക്കൂടിനുള്ളിൽ നിന്നുകൊണ്ടായിരിക്കണമെന്നും ജസ്റ്റിസ് ജോയ്മാല്യ ബാഗ്ചി, ജസ്റ്റിസ് വി. മോഹന എന്നിവരടങ്ങിയ ബെഞ്ച് വ്യക്തമാക്കി.

 

മെട്രോ, റെയിൽവേ സർവീസുകൾ തടസ്സമില്ലാതെ സാധാരണ നിലയിൽ പ്രവർത്തിക്കണമെന്നും നിയമപരമായ നിബന്ധനകൾക്ക് വിധേയമായി ഇന്റർനെറ്റ് സംവിധാനങ്ങൾ പ്രവർത്തനക്ഷമമായി തുടരണമെന്നും കോടതി നിർദ്ദേശിച്ചു. തികച്ചും അനിവാര്യമായ സാഹചര്യങ്ങളിലൊഴികെ ഡൽഹി നഗരത്തിലുടനീളം സ്ഥാപിച്ചിട്ടുള്ള ബാരിക്കേഡുകൾ അടിയന്തരമായി നീക്കം ചെയ്യണം. പൊതു ക്രമസമാധാന പരിപാലനത്തിന്റെ ഭാഗമായുള്ള സ്വാഭാവിക നിയന്ത്രണങ്ങൾ നിലനിർത്തിക്കൊണ്ടുതന്നെ പൊതുജനങ്ങളുടെ സഞ്ചാരസ്വാതന്ത്ര്യവും വാഹന ഗതാഗതവും പുനഃസ്ഥാപിക്കണമെന്ന് ബെഞ്ച് വ്യക്തമാക്കി.

 

കൂട്ടംകൂടുന്നത് നിരോധിച്ചുകൊണ്ട് ബിഎൻഎസ്എസ് 2023 ലെ സെക്ഷൻ 163 പ്രകാരം ഏർപ്പെടുത്തിയ നിയന്ത്രണങ്ങൾ പിൻവലിക്കാൻ അധികാരികളോട് കോടതി നിർദ്ദേശിച്ചു. സുപ്രീം കോടതിയുടെ പരിസരപ്രദേശങ്ങളിലും സെക്ഷൻ 163 പ്രകാരം നിരോധനാജ്ഞ പ്രഖ്യാപിച്ചതായി തങ്ങളുടെ ശ്രദ്ധയിൽപ്പെട്ടിട്ടുണ്ട്. സുപ്രീം കോടതിയിലേക്കും മറ്റ് കോടതികളിലേക്കും അഭിഭാഷകർക്കും പൊതുജനങ്ങൾക്കും വന്നുപോകുന്നതിനും നീതി ലഭ്യമാക്കുന്നതിനുമുള്ള അവസരങ്ങൾക്ക് യാതൊരു തടസ്സവും ഉണ്ടാകില്ലെന്ന് ഉറപ്പുവരുത്താൻ ഈ നിയന്ത്രണം ഉടൻ നീക്കം ചെയ്യണമെന്ന് കോടതി ഉത്തരവിട്ടു. പൊതു ക്രമസമാധാന പ്രശ്നങ്ങൾ ഉണ്ടാകാത്തിടത്തോളം ജനങ്ങളുടെ സഞ്ചാരസ്വാതന്ത്ര്യം തടയരുതെന്നും പരമോന്നത കോടതി നിർദേശം നൽകി.