ജയ്പുർ ∙ രാജസ്ഥാനിലെ ആൽവാർ ജില്ലയിലെ ദന്തിയ ഗ്രാമത്തിൽ രണ്ട് കുട്ടികളെ കത്രിക ഉപയോഗിച്ച് കുത്തി കൊലപ്പെടുത്തിയ അമ്മ ആത്മഹത്യ ചെയ്തു. ഉഷ ശർമ എന്ന യുവതിയാണ് മക്കളായ മുകുൾ (5), നന്ദിനി (4) എന്നിവരെ കുത്തിയ ശേഷം ആത്മഹത്യ ചെയ്തത്. പെൺകുട്ടി വീടിനു പുറത്തുപോയി കളിച്ചതുമായി ബന്ധപ്പെട്ട തർക്കമാണ് കൊലപാതകത്തിൽ കലാശിച്ചത്.

 

വീടിനു പുറത്തുപോയി കളിച്ച കുട്ടികൾ തിരിച്ചെത്തിയപ്പോൾ ഉഷ അവരെ മുറിക്കുള്ളിലേക്ക് കൊണ്ടുപോയി വാതിലടച്ച ശേഷം കത്രിക കൊണ്ട് കുത്തുകയായിരുന്നു. ശേഷം ഉഷ സ്വയം കുത്തിപരുക്കേൽപ്പിച്ചു. കുട്ടികളുടെ നിലവിളി കേട്ട് ഓടിയെത്തിയ ഗ്രാമവാസികളാണ് മുറിവേറ്റ മൂവരേയും കണ്ടെത്തിയത്. ഇതേസമയം ഉഷയുടെ സഹോദരി മനീഷ അസ്വസ്ഥയാവുകയും തല സ്വയം ഭിത്തിയിൽ ഇടിച്ച് പരുക്കേൽപ്പിക്കുകയും ചെയ്തു. തുടർന്ന് ഗ്രാമവാസികൾ പരുക്കേറ്റ നാല് പേരെയും ഖേർലിയിലെ സബ് ജില്ലാ ആശുപത്രിയിൽ എത്തിച്ചു.

 

എന്നാൽ ആശുപത്രിയിൽ എത്തുമ്പോഴേക്കും മുകുൾ മരിച്ചിരുന്നു. ചികിത്സയിൽ ഇരിക്കേ നന്ദിനിയും മാതാവ് ഉഷയും മരിച്ചു. തലയ്ക്ക് ഗുരുതരമായി പരുക്കേറ്റ മനീഷ ഇപ്പോഴും ചികിത്സയിലാണ്. ഉഷയുടെ ഭർത്താവ് അമിത് ശർമ ഗുജറാത്തിലെ സ്വകാര്യ സ്ഥാപനത്തിൽ ജോലി ചെയ്യുകയാണ്.