റിയാദ് ∙ മാതാവിനെ വെടിവച്ച് കൊലപ്പെടുത്തുകയും സഹോദരിയെ വധിക്കാൻ ശ്രമിക്കുകയും ചെയ്ത കേസിൽ സൗദി വനിതയുടെ വധശിക്ഷ നടപ്പാക്കി ആഭ്യന്തര മന്ത്രാലയം.

 

അൽ ഖസീം മേഖലയിൽ നടന്ന സംഭവത്തിൽ കുറ്റക്കാരിയെന്ന് കണ്ടെത്തിയ സഹർ ബിൻത് ഫൈസൽ അൽ ഹർബിയുടെ വധശിക്ഷയാണ് നടപ്പാക്കിയത്. നിരപരാധികളുടെ ജീവനും സുരക്ഷയ്ക്കും ഭീഷണിയാകുന്ന കുറ്റകൃത്യങ്ങൾക്കെതിരെ നിയമപ്രകാരം നടപടി തുടരുമെന്ന് സൗദി ആഭ്യന്തര മന്ത്രാലയം വ്യക്തമാക്കി.

 

∙ ഭീകരവാദക്കേസുകളിലും വധശിക്ഷ

 

ഭീകരവാദക്കേസുകളിൽ ശിക്ഷിക്കപ്പെട്ട അഞ്ച് സ്വദേശികളുടെ വധശിക്ഷയും ശനിയാഴ്ച നടപ്പാക്കി. മക്കയിലെ പള്ളിയിൽ അനുചിതമായി പെരുമാറിയെന്ന കേസിൽ രണ്ട് ബംഗ്ലാദേശി പൗരന്മാരുടെയും വധശിക്ഷ ഒക്ടോബർ 15ന് നടപ്പാക്കിയിരുന്നു. ആംനസ്റ്റി ഇന്റർനാഷനലിന്റെ കണക്കനുസരിച്ച് 2022–2025 കാലയളവിൽ ഏറ്റവും കൂടുതൽ വധശിക്ഷ നടപ്പാക്കിയ രാജ്യങ്ങളിൽ സൗദി മൂന്നാം സ്ഥാനത്താണ്. ചൈനയും ഇറാനുമാണ് മുന്നിൽ.