spotnewswebsite@gmail.com
തിരുവനന്തപുരം∙ കോവളത്തെ സ്പായില്‍ ആന്ധ്ര സ്വദേശിനിയായ പതിനാറുകാരി പീഡനത്തിനിരയായ കേസിന്റെ അന്വേഷണം തമിഴ്‌നാട്ടിലേക്കും. ചെങ്കല്‍പേട്ട ഗുഡുവാഞ്ചേരിയിലെ സ്പായില്‍ എത്തിച്ചു തന്നെ പീഡിപ്പിച്ചിരുന്നുവെന്ന് പെണ്‍കുട്ടി മൊഴി നല്‍കിയതിന്റെ അടിസ്ഥാനത്തില്‍ കോവളം പൊലീസ് സീറോ എഫ്‌ഐആര്‍ റജിസ്റ്റര്‍ ചെയ്തു. കേസ് തമിഴ്നാട് പൊലീസിനു കൈമാറി.
ഇളയമ്മയും ഭര്‍ത്താവും ചേര്‍ന്ന ആദ്യം തന്നെ ബെംഗളൂരുവില്‍ കൊണ്ടുപോയെന്നും പിന്നീട് ചെന്നൈയില്‍ എത്തിച്ചുവെന്നുമാണ് പെണ്‍കുട്ടി പൊലീസിനോടു പറഞ്ഞത്. ചെന്നൈയില്‍ എത്തിച്ചതിനു ശേഷം ഗുഡുവാഞ്ചേരിയിലെ സ്പായില്‍ കൊണ്ടുപോയി. അവിടെ തനിക്ക് ലൈംഗികപീഡനം നേരിടേണ്ടിവന്നുവെന്നും പെണ്‍കുട്ടി മൊഴി നല്‍കിയിട്ടുണ്ട്. ഇതിന്റെ അടിസ്ഥാനത്തിലാണ് സീറോ എഫ്‌ഐആര്‍ റജിസ്റ്റര്‍ ചെയ്ത് ഗുഡുവാഞ്ചേരി പൊലീസിനു കൈമാറിയത്. ഏപ്രില്‍, മേയ്, ജൂണ്‍ മാസങ്ങളിലാണ് പെണ്‍കുട്ടിയെ അവിടെ എത്തിച്ചതെന്നാണു പൊലീസിനു കിട്ടിയ വിവരം.
ഇതിനൊപ്പം കോവളത്തെ സ്പായില്‍ പെണ്‍കുട്ടി ഉണ്ടായിരുന്ന സമയത്ത് എത്തിയ ഇടപാടുകാരുടെ മുഴുവന്‍ വിവരങ്ങളും പൊലീസ് ശേഖരിക്കുകയാണ്. ഈ ദിവസങ്ങളിലെ സിസിടിവി ദൃശ്യങ്ങള്‍ പരിശോധിച്ച് ഇടപാടുകാരെ കണ്ടെത്തി അവരുമായി ബന്ധപ്പെട്ട് മൊഴിയെടുക്കും. സ്പായില്‍ വച്ച് തനിക്കു ലൈംഗികപീഡനം നേരിടേണ്ടിവന്നുവെന്ന പെണ്‍കുട്ടി മൊഴി നല്‍കിയിരുന്നു. ആര്‍ക്കൊക്കെ ഇതില്‍ പങ്കുണ്ടെന്നു കണ്ടെത്താനുള്ള ശ്രമത്തിലാണു പൊലീസ്. സ്പായുമായി ബന്ധമുണ്ടെന്ന് ആരോപിക്കപ്പെടുന്ന കോര്‍പറേഷനിലെ ഹെല്‍ത്ത് ഇന്‍സ്‌പെക്ടറുടെ ബാങ്ക് രേഖകളും പൊലീസ് പരിശോധിച്ചു.
