‘ആഡംബര കാറും ബൈക്കും വേണം’: ഭാര്യയെ മുടിയ്ക്ക് കുത്തിപ്പിടിച്ച് വലിച്ചിഴച്ച് യുവാവ്; മർദനത്തിന്റെ സിസിടിവി ദൃശ്യം പുറത്ത്

Spread the love

ലുധിയാന∙ മഹീന്ദ്ര ഥാറും ബൈക്കും ആവശ്യപ്പെട്ട് യുവതിയെ ക്രൂരമായി മർദിച്ച് ഭർത്താവ്. പഞ്ചാബിലെ ലുധിയാനയിലാണ് സംഭവം. റിതിഷ് ശർമ ഭാര്യയായ ട്വിങ്കിളിനെ വീട്ടിൽനിന്ന് തലമുടിയിൽ വലിച്ചിഴച്ച് കൊണ്ടുവരുന്നതും മർദിക്കുന്നതുമായി സിസിടിവി ദൃശ്യങ്ങൾ പുറത്തുവന്നു. ഒക്ടോബർ 21നാണ് സംഭവം. ട്വിങ്കിളിന്റെ നിലവിളി കേട്ട് ഓടിയെത്തിയ നാട്ടുകാരാണ് റിതിഷിനെ പിടിച്ചുമാറ്റി ഭാര്യയെ രക്ഷപ്പെടുത്തിയത്.

സംഭവത്തിൽ ഭർത്താവിനെതിരെ ട്വിങ്കിൾ പൊലീസിൽ പരാതി നൽകുകയും സിസിടിവി ദൃശ്യങ്ങൾ തെളിവായി ഹാജരാക്കുകയും ചെയ്തു. കഴിഞ്ഞ വർഷം നവംബറിലാണ് ആരോഗ്യമേഖലയിൽ ജോലി ചെയ്യുന്ന റിതിഷും ട്വിങ്കിളുമായുള്ള വിവാഹം നടന്നത്. ട്വിങ്കിൾ ഒരു സലൂൺ നടത്തിവരികയാണ്. റിതിഷിന്റെ ആദ്യ വിവാഹവും ട്വിങ്കിളിന്റെ രണ്ടാം വിവാഹവുമാണ്.

രണ്ടു വർഷം മുൻപ് ട്വിങ്കിളിന്റെ വിവാഹമോചനവുമായി ബന്ധപ്പെട്ട നടപടികൾ നടക്കുന്ന സമയത്താണ് ഇരുവരും പരിചയപ്പെടുന്നതും പിന്നീട് വിവാഹതരാകുന്നതും. മൂന്നു മാസത്തോളമായി ഥാർ വേണമെന്ന് ആവശ്യപ്പെട്ട് റിതിഷ് ഉപദ്രവിക്കാറുണ്ടെന്ന് ട്വിങ്കിൾ പറയുന്നു. പിന്നാലെ ബൈക്ക് വേണമെന്നും ആവശ്യപ്പെട്ടു തുടങ്ങിയെന്നും പറയുന്നു.