ബോസ്റ്റൺ∙ വിമാനയാത്രയ്ക്കിടെ 17 വയസ്സുകാരിയെ ലൈംഗികമായി ഉപദ്രവിച്ച കേസിൽ യുഎസ് പൗരനായ ജോനാഥൻ അലൻ ലെഫ്മാനെ (48) ജൂറി കുറ്റക്കാരനെന്ന് കണ്ടെത്തി. മാസച്യുസിറ്റ്‌സിലെ ന്യൂട്ടൺ സ്വദേശമായ ഇയാൾ ഭാര്യയ്ക്കും നാല് മക്കൾക്കുമൊപ്പം യാത്ര ചെയ്യുന്നതിനിടെ പെൺകുട്ടിയോട് അപമര്യാദയായി പെരുമാറിയത്.

 

2024 ഓഗസ്റ്റ് 30ന് പ്യൂർട്ടോ റിക്കോയിൽനിന്ന് ബോസ്റ്റണിലേക്കുള്ള ജെറ്റ്‌ബ്ലൂ വിമാനത്തിലായിരുന്നു സംഭവം. വിമാനത്തിൽ ലെഫ്മാന് തൊട്ടുമുന്നിലെ സീറ്റിലിരുന്ന 17 വയസ്സുകാരിയെ പലതവണ ഇയാൾ ലൈംഗികമായി സ്പർശിച്ചതായിട്ടാണ് കേസ്. സംഭവസമയത്ത് ലെഫ്മാന്റെ തൊട്ടടുത്ത സീറ്റിൽ 16 വയസ്സുകാരനായ മകനും ഉണ്ടായിരുന്നു. സീറ്റിന് മുന്നിലുള്ള സ്ക്രീനിലെ പ്രതിഫലനത്തിലൂടെ പിന്നിലിരിക്കുന്നയാൾ സീറ്റിനിടയിലൂടെ കൈ നീട്ടുന്നത് പെൺകുട്ടി ശ്രദ്ധിച്ചു. തുടർന്ന് സീറ്റിനിടയിലൂടെ പുറത്തേക്കു വന്ന വിരലുകളുടെ ചിത്രം പകർത്തുകയും ചെയ്തു.

 

വിമാനം ഇറങ്ങിയശേഷം മറ്റൊരു നിരയിൽ യാത്ര ചെയ്തിരുന്ന പെൺകുട്ടിയുടെ കുടുംബത്തിലെ മുതിർന്ന വനിതാ അംഗം ലെഫ്മാനെ ചോദ്യം ചെയ്തു. തുടർന്ന് ജെറ്റ്‌ബ്ലൂ ജീവനക്കാരനെ വിവരമറിയിക്കുകയും തെളിവായി വിരലുകൾ ദൃശ്യമാകുന്ന വിഡിയോ കൈമാറുകയും ചെയ്തു.

 

താൻ ശരീരം സ്ട്രെച്ച് ചെയ്തതാണെന്നും സംഭവത്തിൽ ക്ഷമ ചോദിക്കുന്നുവെന്നും ലെഫ്മാൻ പ്രതികരിച്ചതായി അന്വേഷണ രേഖകളിൽ പറയുന്നു. വിഡിയോയിൽ പതിഞ്ഞ വിരലുകൾ തന്റേതാണോയെന്ന് ചോദിച്ചപ്പോൾ, ‘അങ്ങനെ തോന്നുന്നില്ല’ എന്നായിരുന്നു ഇയാളുടെ മറുപടിയെന്നും റിപ്പോർട്ടുകളിലുണ്ട്. വിമാനത്തിനുള്ളിൽ ലൈംഗിക അതിക്രമം നടത്തിയതിന് അടുത്ത വർഷം ജനുവരി 12ന് ശിക്ഷ വിധിക്കും.