തിരുവനന്തപുരം: കെഎസ്ആര്‍ടിസി ബസുകളിലെ ‘പ്രിയദര്‍ശനി’ സൗജന്യ യാത്രാപദ്ധതിയിലൂടെ വനിതകളും ട്രാന്‍സ്ജെന്‍ഡര്‍ വിഭാഗവും കഴിഞ്ഞ 115 ദിവസത്തിനിടെ നടത്തിയത് ഏകദേശം 15 കോടി യാത്രകള്‍. പ്രതിദിനം ശരാശരി 13.04 ലക്ഷം യാത്രകളാണ് ഇവര്‍ നടത്തിയത്. സംസ്ഥാനത്തെ സ്ത്രീകളുടെ ജനസംഖ്യയുമായി താരതമ്യം ചെയ്യുമ്പോള്‍, ഓരോ പെണ്‍കുട്ടിക്കും സ്ത്രീക്കും ഏകദേശം എട്ട് സൗജന്യ യാത്രകളാണ് ഇതിലൂടെ ലഭിച്ചിരിക്കുന്നത്. പദ്ധതി ആരംഭിച്ചതിനുശേഷമുള്ള യാത്രാനിരക്കില്‍ 101 ശതമാനത്തിന്റെ വന്‍ വര്‍ധനയാണ് ഉണ്ടായിരിക്കുന്നത്. നിയമസഭാ സമ്മേളനത്തില്‍ ഗതാഗത മന്ത്രി സിപി ജോണ്‍ ആണ് ഈ കണക്കുകള്‍ അവതരിപ്പിച്ചത്.പദ്ധതി സ്വകാര്യ ബസുകളുടെ വരുമാനത്തെ ബാധിച്ചിട്ടില്ലെന്ന് മന്ത്രി ആവര്‍ത്തിച്ചു വ്യക്തമാക്കിയെങ്കിലും, സ്വകാര്യ ബസ് ഉടമകള്‍ ഈ വാദത്തെ തള്ളിക്കളഞ്ഞു. നവംബര്‍ 3 മുതല്‍ അനിശ്ചിതകാല സമരവുമായി മുന്നോട്ട് പോകാനാണ് സ്വകാര്യ ബസ് ഉടമകളുടെ തീരുമാനം. സംസ്ഥാനത്തെ സ്ത്രീ ജനസംഖ്യയുടെ 7 ശതമാനത്തോളം ഇപ്പോള്‍ ദിവസേന പ്രിയദര്‍ശിനി പദ്ധതി പ്രയോജനപ്പെടുത്തുന്നതായാണ് ഔദ്യോഗിക കണക്ക്. പദ്ധതി നിലവില്‍ വരുന്നതിന് മുന്‍പുള്ള നിരക്കുമായി താരതമ്യം ചെയ്യുമ്പോള്‍ ഇത് ഇരട്ടിയാണ്. നേരത്തെ ഇത് 3.5 ശതമാനമായിരുന്നു.പുതിയ കണക്കുകള്‍ പ്രകാരം, ഓര്‍ഡിനറി ബസുകളിലെ യാത്രക്കാരില്‍ 60 ശതമാനത്തിലധികവും സ്ത്രീകളും ട്രാന്‍സ്ജെന്‍ഡര്‍മാരുമാണ്. ഇതോടെ കെഎസ്ആര്‍ടിസിയുടെ എല്ലാ സര്‍വീസുകളിലെയും മൊത്തത്തിലുള്ള പ്രതിദിനം യാത്രാ ചെയ്യുന്നവരുടെ എണ്ണം 27 ലക്ഷം കവിഞ്ഞു. എന്നാല്‍ യാത്രക്കാരുടെ ഈ വന്‍ തിരക്ക് സംസ്ഥാനത്തെ ഗതാഗത സംവിധാനങ്ങളെ സാരമായി ബാധിച്ചിട്ടുണ്ട്. ആകെ രജിസ്റ്റര്‍ ചെയ്ത 5,765 ബസുകളില്‍ 4,468 വാഹനങ്ങള്‍ മാത്രമാണ് നിലവില്‍ കെഎസ്ആര്‍ടിസിക്കുള്ളത്. ഇവയിലൂടെയാണ് ദിവസേനയുള്ള 4,663 ഷെഡ്യൂളുകള്‍ സര്‍വീസ് നടത്തുന്നത്. ആകെയുള്ള 3,125 ഓര്‍ഡിനറി ബസുകളില്‍ 2,617 എണ്ണത്തെ ആശ്രയിച്ചാണ് ദൈനംദിന യാത്രകള്‍ മുന്നോട്ടുപോകുന്നത്. ഇത് തിരക്കേറിയ സമയങ്ങളില്‍ യാത്രാപ്രതിസന്ധിക്ക് കാരണമാകുന്നുണ്ട്.അതേസമയം, സ്വകാര്യ ബസുകളിലെ യാത്രക്കാരുടെ എണ്ണത്തില്‍ വലിയ കുറവാണ് ഉണ്ടായിരിക്കുന്നത്. വന്‍ നഷ്ടം കാരണം കഴിഞ്ഞ ഒരു മാസത്തിനിടെ അഞ്ഞൂറിലധികം സ്വകാര്യ ബസുകള്‍ സര്‍വീസ് നിര്‍ത്തിയതായി ബസ് ഉടമകള്‍ അവകാശപ്പെടുന്നു. തങ്ങളുടെ പ്രധാന യാത്രക്കാരായ സ്ത്രീകള്‍ കെഎസ്ആര്‍ടിസിയിലേക്ക് മാറിയത് വലിയ തിരിച്ചടിയായെന്നും സര്‍ക്കാരിന്റെ ഭാഗത്തുനിന്നും ലഭിച്ച നിര്‍ദ്ദേശങ്ങള്‍ അപര്യാപ്തമാണെന്നും ബസ് ഓപ്പറേറ്റേഴ്‌സ് ഫെഡറേഷന്‍ പറയുന്നു.എന്നാല്‍ പ്രിയദര്‍ശനി പദ്ധതി സ്വകാര്യ ബസുകളെ ബാധിച്ചിട്ടില്ലെന്ന് കണ്ടെത്തിയ ഉന്നതതല വിദഗ്ധ സമിതി അംഗം ഈ വാദങ്ങളെ എതിര്‍ത്തു. സ്വകാര്യ ബസ് മേഖലയിലുള്ള പ്രതിസന്ധികള്‍ക്കെല്ലാം പ്രിയദര്‍ശനി പദ്ധതിയാണ് കാരണം എന്ന് പറയുന്നത് ശരിയല്ലെന്നാണ് വിദഗ്ധ സമിതിയുടെ പക്ഷം. എംഎസ്എംഇ പദവി നല്‍കുന്നതും ഷെഡ്യൂളുകള്‍ പുനഃക്രമീകരിക്കുന്നതും സ്വകാര്യ ബസ് ഉടമകള്‍ക്ക് ബിസിനസില്‍ തുടരാന്‍ സഹായകരമാകുമെന്നും അദ്ദേഹം കൂട്ടിച്ചേർത്തു.