spotnewswebsite@gmail.com
കുവൈത്ത് സിറ്റി∙ കുവൈത്തിലെ നിർമാണ സ്ഥലത്ത് സുരക്ഷാ ജീവനക്കാരനെ കൊലപ്പെടുത്തിയ കേസിൽ പ്രവാസി അറസ്റ്റിൽ. കൃത്യം റിപ്പോർട്ട് ചെയ്ത് 24 മണിക്കൂറിനുള്ളിലാണ് ബംഗ്ലാദേശ് പൗരനായ പ്രതിയെ പിടികൂടിയത്. കുവൈത്ത് ആഭ്യന്തര മന്ത്രാലയത്തിനു കീഴിലെ ക്രിമിനൽ ഇൻവെസ്റ്റിഗേഷൻ വിഭാഗവും ജഹ്റ ഇൻവെസ്റ്റിഗേഷൻ വിഭാഗവും പൊതുസുരക്ഷാ വിഭാഗത്തിന്റെ സഹകരണത്തോടെയായിരുന്നു അറസ്റ്റ്.
കഴിഞ്ഞ മാസം 30ന് രാവിലെ മുത്ലാ മേഖലയിലെ നിർമാണ സ്ഥലത്തിന്റെ മേൽക്കൂരയിൽ സുരക്ഷാ ജീവനക്കാരന്റെ മൃതദേഹം കണ്ടെത്തിയതായി അധികൃതർക്ക് വിവരം ലഭിക്കുന്നത്. ഇതേ തുടർന്ന് ഇവിടെ അന്വേഷണ ഉദ്യോഗസ്ഥർ പരിശോധന നടത്തുകയും തെളിവ് ശേഖരിക്കുകയും ചെയ്തു.
ഇതിനിടെ മുൻപ് ഈ നിർമാണ സ്ഥലത്ത് ജോലി ചെയ്തിരുന്ന ബംഗ്ലാദേശ് പൗരനിലേക്ക് സംശയം നീണ്ടു. കൊല്ലപ്പെട്ട ജീവനക്കാരന്റെ മൃതദേഹം കണ്ടെത്തുന്നതിന് ഒരു ദിവസം മുൻപ് ഇയാളെ ജോലിയിൽനിന്ന് പിരിച്ചുവിട്ടിരുന്നു. തനിക്ക് ജോലി നഷ്ടമായതിന്റെ വിഷമത്തിലാണ് പുതിയ സുരക്ഷാ ജീവനക്കാരനെ പ്രതി വകവരുത്തിയത്.
കാലാവധി കഴിഞ്ഞ വീസയുമായി ബന്ധപ്പെട്ട അറസ്റ്റ് വാറന്റിനെത്തുടർന്ന് പ്രതി പിന്നീട് ഷർഖ് പൊലീസ് സ്റ്റേഷനിൽ കീഴടങ്ങുകയായിരുന്നു. കൊലപാതകത്തിൽ പങ്കുണ്ടെന്ന് കണ്ടെത്തുന്നതിന് മുൻപ് നാടുകടത്തൽ നടപടികൾക്ക് വിധേയനാകുകയായിരുന്നു പ്രതിയുടെ ലക്ഷ്യമെന്ന് അന്വേഷണത്തിൽ വ്യക്തമായതായി ആഭ്യന്തര മന്ത്രാലയം അറിയിച്ചു.
