spotnewswebsite@gmail.com
ചെന്നൈ ∙ തേനി ജില്ലാ ജയിലിൽ നിന്നു ചാടിപ്പോയ 17 തടവുകാരിൽ ഒരാൾ അറസ്റ്റിലാകുന്നതിനു മുൻപെടുത്തതെന്നു കരുതുന്ന വിഡിയോ സമൂഹമാധ്യമത്തിൽ വൈറലായി. ജയിൽ ചാടിയ 17 പേരിൽ ഒരാളായ മീനാക്ഷി സുന്ദരം സംസാരിക്കുന്ന വിഡിയോയാണു പുറത്തുവന്നത്. താൻ ജയിലിൽ നിന്നു രക്ഷപ്പെട്ടത് ഒളിവിലിരിക്കാനല്ലെന്നും, മറിച്ചു പരാതികൾ ജഡ്ജിയുടെ ശ്രദ്ധയിൽപെടുത്താൻ വേണ്ടിയാണെന്നും പറയുന്നു. ജയിൽ ഉദ്യോഗസ്ഥർ പീഡിപ്പിക്കുകയാണെന്നും പുഴുവുള്ള ഭക്ഷണം നൽകിയെന്നുമാണ് ആരോപണം. വിഡിയോയിൽ പറയുന്നതു തെറ്റാണെന്നു ചൂണ്ടിക്കാട്ടി ദക്ഷിണ മേഖല ഐജി വിജേന്ദ്ര ബിദാരി ആരോപണം തള്ളി. കീഴടങ്ങുന്നതിനു മുൻപ് അഭിഭാഷകന്റെ സഹായത്തോടെയാണു വിഡിയോ ചിത്രീകരിച്ചതെന്നും ഐജി വിശദീകരിച്ചു.
∙ പുറംജോലി നിർത്തി
ജയിലിനു പുറത്തു പെട്രോൾ പമ്പുകളിലും വിൽപനശാലകളിലും ജോലിക്കു നിയോഗിച്ച മുഴുവൻ തടവുകാരെയും തമിഴ്നാട് ജയിൽവകുപ്പ് തിരികെ വിളിച്ചു. ഇതോടെ ഇവ അടച്ചു പൂട്ടേണ്ട സാഹചര്യത്തിലായി. ജയിൽച്ചാട്ടം ആവർത്തിക്കുന്നതിനാൽ പരമാവധി ജീവനക്കാരെ ജയിലിൽത്തന്നെ കാവൽ ജോലിക്കു നിയോഗിക്കാനാണു തീരുമാനം.
∙ ഉദ്യോഗസ്ഥർക്ക് സ്ഥലംമാറ്റം
വിവാദ ജയിൽചാട്ടങ്ങളെ തുടർന്നു ജയിൽ വകുപ്പ് മധുര, സേലം, കടലൂർ സെൻട്രൽ ജയിലുകളിലെ മൂന്ന് ഉദ്യോഗസ്ഥരെ സ്ഥലംമാറ്റി. സൂപ്രണ്ട്, അഡിഷനൽ സൂപ്രണ്ട് എന്നിവരെയാണു മാറ്റിയിരിക്കുന്നത്. നേരത്തെ ജയിൽ ഡിജിപി സന്ദീപ് റായ് റാത്തോഡിനെ സ്ഥലംമാറ്റുകയും പകരം എഡിജിപി കെ.ശങ്കറിനെ നിയമിക്കുകയും ചെയ്തിരുന്നു.
