ഇരുളം മേഖലയില്‍ വ്യാപകമായി കാര്‍ഷിക വിളകള്‍ മോഷണം പോകുന്നതായി പരാതി. അടക്ക, കാപ്പിക്കുരു, കുരുമുളക് തുടങ്ങിയ വിളകളാണ് രാത്രിയില്‍ മോഷണം പോകുന്നത് പതിവായിരിക്കുന്നത്. വിളവെടുപ്പ് സീസണ്‍ വന്നതോടെയാണ് കൃഷിയിടങ്ങളില്‍ പഴുത്ത് നില്ക്കുന്ന പച്ച കാപ്പിക്കുരു വ്യാപകമായി മോഷണം പോകാന്‍ തുടങ്ങിയത്.രാത്രിയുടെ മറവില്‍ കാപ്പിയുടെ കമ്പ് മുഴുവന്‍ വെട്ടി കൊണ്ടപപോയി മറ്റൊരു സ്ഥലത്ത് വെച്ചാണ് കാപ്പിക്കുരു എടുക്കുന്നത്. കഴിഞ്ഞ ദിവസം വളാഞ്ചേരി, പരപ്പനങ്ങാടി, മരിയനാട് മേഖലകളിലെ കര്‍ഷകരായ പാലിയത്ത് സുധീന്ദ്രന്‍, രാജീവന്‍, സജീവന്‍, വി.ജി ബോസ് എന്നിവരുടെ ക്വിന്റല്‍ കണക്കിന് പച്ച കാപ്പികുരുവും പഴുത്ത കുരുവുംമോഷ്ടാക്കള്‍ കടത്തികൊണ്ടു പോയി. കൂടാതെ നിരവധി കര്‍ഷകരുടെ അടക്കയും മോഷണം പോയിട്ടുണ്ട്. കുട്ടികളെ ഉപയോഗിച്ച് മുതിര്‍ന്നവരാണ് മോഷണം നടത്തുന്നതെന്നും ആരോപണമുണ്ട്. വിളവെടുപ്പ് സമയത്ത് പച്ചകാപ്പിക്കുരു വാങ്ങുന്നത് വ്യാപാരികള്‍ താല്‍ക്കാലികമായി നിര്‍ത്തിവെക്കണമെന്നാണ് കര്‍ഷകരുടെ ആവശ്യം. കേണിച്ചിറ പോലീസ് അന്വേഷണം ആരംഭിച്ചിട്ടുണ്ട്.