കാസർകോട്: ബോവിക്കാനം കാട്ടിപ്പള്ളത്ത് പ്രവാസി യുവാവ് ദുരൂഹ സാഹചര്യത്തിൽ വെടിയേറ്റു മരിച്ചു. കാട്ടിപ്പള്ളം സ്വദേശി കെ. മൊയ്തീൻ കുഞ്ഞിയുടെ മകൻ ഹൈദർ അലി (27) ആണ് മരിച്ചത്. വിദേശത്തായിരുന്ന ഹൈദർ അലി അടുത്തിടെയാണ് അവധിക്കായി നാട്ടിലെത്തിയത്. സംഭവത്തിൽ ആദൂർ പോലീസ് കേസെടുത്ത് ഊർജിതമായ അന്വേഷണം ആരംഭിച്ചു.
കഴിഞ്ഞ ദിവസം പുലർച്ചെ ഒരു മണിയോടെയാണ് സംഭവം ഉണ്ടായത്. ഹൈദർ അലി സഞ്ചരിച്ചിരുന്ന സ്കൂട്ടർ റോഡിൽ മറിഞ്ഞ നിലയിൽ കിടക്കുന്നത് സുഹൃത്താണ് ആദ്യം കണ്ടത്. ഉടൻ തന്നെ ഇദ്ദേഹത്തെ അടുത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ആശുപത്രിയിൽ എത്തുന്നതിന് മുൻപ് തന്നെ മരണം സംഭവിച്ചിരുന്നതായി ഡോക്ടർമാർ സ്ഥിരീകരിച്ചു.
വിവരമറിഞ്ഞ് ആദൂർ പോലീസ് സ്ഥലത്തെത്തി നടത്തിയ വിശദമായ പരിശോധനയിലാണ് അപകടസ്ഥലത്തുനിന്ന് നായാട്ടിനായി ഉപയോഗിക്കുന്ന തരത്തിലുള്ള തോക്ക് കണ്ടെത്തിയത്. ഹൈദർ അലിയുടെ കവിളിൽ വെടിയേറ്റ പാടുള്ളതായും പോലീസ് പരിശോധനയിൽ വ്യക്തമായി. വെടിയേറ്റതാണ് മരണകാരണമെന്ന് പോലീസ് സ്ഥിരീകരിച്ചിട്ടുണ്ട്. കണ്ടെടുത്ത തോക്കിൽ മുഴുവൻ തിരകൾ നിറച്ചിരുന്നതായും പോലീസ് അറിയിച്ചു.
യുവാവ് നായാട്ടിനായി പോയതാണോ അതോ മറ്റെന്തെങ്കിലും അസ്വാഭാവിക സാഹചര്യമാണോ മരണത്തിലേക്ക് നയിച്ചതെന്ന കാര്യത്തിൽ പോലീസ് വ്യക്തത വരുത്താൻ ശ്രമിക്കുകയാണ്. പോസ്റ്റ്മോർട്ടം നടപടികൾക്കായി മൃതദേഹം ജനറൽ ആശുപത്രി മോർച്ചറിയിലേക്ക് മാറ്റി. സംഭവവുമായി ബന്ധപ്പെട്ട് കൂടുതൽ പേരുടെ മൊഴി രേഖപ്പെടുത്താനും ശാസ്ത്രീയ പരിശോധനകൾ നടത്താനും പോലീസ് തീരുമാനിച്ചിട്ടുണ്ട്.





