spotnewswebsite@gmail.com
സുല്ത്താന്ബത്തേരി: വനംവകുപ്പിന്റെ രണ്ട് സഫാരി ബസുകള് പിടിച്ചെടുത്ത് കോടതി. കാട്ടാനയുടെ ആക്രമണത്തില് കൊല്ലപ്പെട്ട യുവാവിന്റെ കുടുംബത്തിന് കൂടുതല് നഷ്ടപരിഹാരം നല്കണമെന്ന ഉത്തരവ് നടപ്പിലാക്കാത്തതിനെത്തുടര്ന്നാണ് നീക്കം. മുത്തങ്ങയില് വിനോദസഞ്ചാരികളെ വനത്തിനുള്ളിലേക്ക് കൊണ്ടുപോകാന് ഉപയോഗിക്കുന്ന മിനി ബസുകളാണ് സുല്ത്താന് ബത്തേരി ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി (രണ്ട്) ജപ്തി ചെയ്തത്. 2014-ല് വാകേരി കൂടല്ലൂരില് കാട്ടാനയുടെ ആക്രമണത്തില് താഴേടത്ത് രജീഷ് എന്ന യുവാവ് കൊല്ലപ്പെട്ടിരുന്നു. അന്ന് വനംവകുപ്പ് നല്കിയ ആറ് ലക്ഷം രൂപ നഷ്ടപരിഹാരം അപര്യാപ്തമാണെന്ന് ചൂണ്ടിക്കാട്ടി രജീഷിന്റെ മാതാവ് സെലീന കോടതിയെ സമീപിച്ചു. തുടര്ന്ന് 2021-ല് അഞ്ച് ലക്ഷം രൂപ കൂടി അധികമായി നല്കാന് കോടതി ഉത്തരവിട്ടെങ്കിലും വനംവകുപ്പ് തുക നല്കാന് തയ്യാറായില്ല. കഴിഞ്ഞ ഒക്ടോബറില് വാഹനങ്ങള് ജപ്തി ചെയ്യാന് ഉദ്യോഗസ്ഥരെത്തിയപ്പോള് തുക നല്കാമെന്ന് വനംവകുപ്പ് ഉറപ്പ് നല്കിയിരുന്നെങ്കിലും പാലിക്കപ്പെട്ടില്ല. ഇതേത്തുടര്ന്നാണ് കോടതി നേരിട്ട് ഇടപെട്ട് ബസുകള് പിടിച്ചെടുത്തത്.കോടതിയില് നിന്ന് സ്റ്റേ ലഭിച്ചാല് മാത്രമേ വാഹനങ്ങള് തിരികെ ലഭിക്കൂ.
