തിരുവനന്തപുരം ∙ ചാലയിലെ ജ്വല്ലറി ഉടമ നന്ദകുമാറിൽ നിന്ന് കവർന്ന 2 കിലോയോളം സ്വർണത്തിൽ 146 പവൻ വെള്ളായണി ക്ഷേത്രത്തിനു സമീപത്തെ ഒഴിഞ്ഞ പറമ്പിൽ കുഴിച്ചിട്ട നിലയിൽ കണ്ടെത്തി. പ്രതികളിലൊരാളായ അനൂപാണ് സ്വർണം കുഴിച്ചിട്ട സ്ഥലം പൊലീസിന് കാട്ടിക്കൊടുത്തത്. 2 കിലോ സ്വർണം നഷ്ടമായെന്ന പരാതി കളവാണെന്നും കഴിഞ്ഞ ദിവസം വയനാട്ടിൽ കാറിൽ നിന്നു പിടിച്ചെടുത്ത 450 ഗ്രാം മാത്രമേ കവർന്നിട്ടുള്ളു എന്നുമുള്ള പ്രതികളുടെ വാദം കളവാണെന്നു വ്യക്തമായി. വീണ്ടെടുത്ത സ്വർണത്തിന്റെ അളവ് ഇതോടെ 202 പവൻ ആയി.
കേസിലെ പ്രതികളായ അമോൽ, അനിൽ, അനൂപ് രാജ്, ആന്റണി, ദിലീപ്, ശ്രാവൺ എന്നിവരെ പൊലീസ് ചോദ്യം ചെയ്തപ്പൊഴാണ് സ്വർണം കുഴിച്ചിട്ട വിവരം പുറത്തുവന്നത്. പ്രതികളെ 7 ദിവസത്തേക്കാണ് കസ്റ്റഡിയിൽ ലഭിച്ചിട്ടുള്ളത്. ഗൂഢാലോചനയിൽ പങ്കുണ്ടെന്നു പൊലീസ് ഉറപ്പിക്കുന്ന മാളവിക ജ്വല്ലറി ഉടമ ജയറാമിനെ സ്റ്റേഷനിൽ വിളിച്ചുവരുത്തി നോട്ടിസ് നൽകി അയച്ചു. കവർച്ചയുടെ പ്രധാന ആസൂത്രകൻ ജയറാമാണെന്ന് അനൂപും അമോലും മൊഴി നൽകിയിട്ടുണ്ട്. കൂടുതൽ തെളിവുകളുടെ അടിസ്ഥാനത്തിൽ ജയറാമിന്റെ അറസ്റ്റ് രേഖപ്പെടുത്താനാണു പൊലീസിന്റെ നീക്കം. കണക്കിൽപ്പെടാത്ത സ്വർണമായതിനാൽ നന്ദകുമാർ പൊലീസിനെ സമീപിക്കില്ലെന്ന പ്രതികളുടെ കണക്കുകൂട്ടൽ തെറ്റിയതാണ് അന്വേഷണത്തിലേക്ക് വഴിതെളിച്ചത്. കവർച്ചയ്ക്കു ശേഷം തമിഴ്നാട്, കർണാടക എന്നിവിടങ്ങളിലൂടെ നീങ്ങിയ പ്രതികൾ യാത്രയ്ക്കിടെ സ്വർണം വിറ്റതായാണു സൂചന. നന്ദകുമാറിന്റെ ബിസിനസ് തങ്ങൾക്ക് വെല്ലുവിളിയായതാണു കവർച്ചയ്ക്ക് പ്രേരിപ്പിച്ചതെന്ന് അമോൽ പൊലീസിനോടു വെളിപ്പെടുത്തി.





