സ്വകാര്യ ആശുപത്രി ഉടമയെ ഭീഷണിപ്പെടുത്തി പത്ത് ലക്ഷം രൂപ തട്ടിയ സംഭവത്തിൽ തിരുവനന്തപുരം ഡിസിസി അംഗവും കോൺഗ്രസ് നേതാവുമായ സുഹൈൽ ഷാജഹാനെ പേട്ട പോലീസ് കസ്റ്റഡിയിൽ എടുത്തു. തിരുവനന്തപുരം കഠിനകുളം സ്വദേശിയാണ് ഇയാൾ.
തലസ്ഥാനത്തെ പ്രമുഖ സ്വകാര്യ ആശുപത്രിയായ ലോർഡ്സ് ആശുപത്രിയുടെ ഉടമയായ ഡോക്ടറെയാണ് സുഹൈൽ ഷാജഹാൻ ബ്ലാക്ക് മെയിൽ ചെയ്തത്. ആശുപത്രിയിലെ ശോച്യാവസ്ഥ സംബന്ധിച്ച ദൃശ്യങ്ങൾ കൈവശമുണ്ടെന്നും ഇത് സോഷ്യൽ മീഡിയയിലൂടെയും ഓൺലൈൻ മാധ്യമങ്ങളിലൂടെയും പ്രചരിപ്പിക്കുമെന്ന് ഭീഷണിപ്പെടുത്തിയായിരുന്നു തട്ടിപ്പ്. ഈ വാർത്ത പുറത്തുവിടാതിരിക്കാൻ പത്ത് ലക്ഷം രൂപ നൽകണമെന്ന് ഇയാൾ ആവശ്യപ്പെടുകയായിരുന്നു.
തുടർന്ന് ആശുപത്രി അധികൃതർ വിവരം പേട്ട പോലീസിനെ അറിയിച്ചു. പോലീസിന്റെ നിർദ്ദേശപ്രകാരം പണം നൽകാനായി വിളിപ്പിച്ചതനുസരിച്ച് ആശുപത്രിയിലെത്തിയ സുഹൈൽ ഷാജഹാൻ പണം കൈപ്പറ്റുകയായിരുന്നു. പണം വാങ്ങിയ ഉടൻ തന്നെ ആശുപത്രി അധികൃതർ ഇയാളെ മുറിയിൽ പൂട്ടിയിടുകയും തുടർന്ന് സ്ഥലത്തെത്തിയ പേട്ട പോലീസ് ഇയാളെ കസ്റ്റഡിയിൽ എടുക്കുകയുമായിരുന്നു. എകെജി സെന്റർ ആക്രമണ കേസ് ഉൾപ്പെടെയുള്ള വിവിധ കേസുകളിൽ പ്രതിയാണ് സുഹൈൽ ഷാജഹാൻ. സംഭവത്തിൽ പോലീസ് കൂടുതൽ അന്വേഷണം നടത്തിവരികയാണ്.






