സൗദി അറേബ്യയിൽ മയക്കുമരുന്ന് പരിശോധന കൂടുതൽ കർശനമാക്കിയതോടെ രാജ്യത്തേക്ക് കടത്താൻ ശ്രമിച്ച ലക്ഷക്കണക്കിന് ലഹരി ഗുളികകൾ പിടികൂടി. രാജ്യത്തെ ഏറ്റവും വലിയ കര തുറമുഖവും ജോർദാൻ അതിർത്തിയിലെ മുഖ്യ കവാടവുമായ അൽ ഹദീത ബോർഡർ പോർട്ടിലാണ് ഈ വൻ മയക്കുമരുന്ന് വേട്ട നടന്നത്. വടക്കൻ കര അതിർത്തി പോർട്ട് വഴിയെത്തിയ ഒരു ട്രക്കിലെ വാണിജ്യ ചരക്കുകൾക്കിടയിൽ ഒളിപ്പിച്ച നിലയിലാണ് വൻ ലഹരി ശേഖരം അധികൃതർ കണ്ടെത്തിയത്.
സകാത്ത്, ടാക്സ് ആൻഡ് കസ്റ്റംസ് അതോറിറ്റി വക്താവ് ഹമൂദ് അൽ ഹർബി നൽകിയ വിവരപ്രകാരം, സൗദിയിലേക്ക് കടത്താൻ ശ്രമിച്ച 4,13,450 ആംഫെറ്റമൈൻ ഗുളികകളാണ് പിടിച്ചെടുത്തത്. ടിന്നിലടച്ച ‘ഫാവ ബീൻസ്’ ശേഖരത്തിനുള്ളിൽ അതിവിദഗ്ദ്ധമായി ഒളിപ്പിച്ച നിലയിലായിരുന്നു ഈ ലഹരിവസ്തുക്കൾ. ജനറൽ ഡയറക്ടറേറ്റ് ഓഫ് നാർക്കോട്ടിക് കൺട്രോൾ വിഭാഗവുമായി സഹകരിച്ച് നടത്തിയ സംയുക്ത നീക്കത്തിലൂടെയാണ് ഈ വൻ കള്ളക്കടത്ത് ശ്രമം തടയാനും പ്രതികളെ പിടികൂടാനും സാധിച്ചത്.








