ഇന്നത്തെ കാലത്ത് എല്ലാവരുടെയും നിത്യജീവിതത്തിന്റെ ഭാഗമായ സ്മാർട്ട്ഫോണുകൾ ദിവസവും ചാർജ് ചെയ്യുന്നത് വൈദ്യുതി ബില്ലിൽ വലിയ വർധനവുണ്ടാക്കുമോ എന്ന സംശയം പലർക്കുമുണ്ട്. സാധാരണയായി ഇപ്പോഴത്തെ സ്മാർട്ട്ഫോണുകളിൽ 5,000mAh ബാറ്ററിയാണ് കാണപ്പെടുന്നത്. ഏകദേശം 4 വോൾട്ട് ശേഷിയുള്ള ഈ ബാറ്ററിയിൽ 20 വാട്ട്-അവർ ഊർജമാണ് സംഭരിക്കാനാവുക. ചാർജിങ് സമയത്തെ ഊർജനഷ്ടം കൂടി കണക്കിലെടുത്താൽ പോലും, ഒരു ഫോൺ പൂജ്യത്തിൽ നിന്ന് 100 ശതമാനം വരെ പൂർണ്ണമായി ചാർജ് ചെയ്യാൻ വെറും 0.019 യൂണിറ്റ് വൈദ്യുതി മാത്രമാണ് ചെലവാകുന്നത്.
ഈ കണക്ക് പ്രകാരം, ദിവസവും ഒരു തവണ ഫോൺ പൂർണ്ണമായി ചാർജ് ചെയ്താൽ ഒരു മാസം ആകെ ഉപയോഗിക്കുന്നത് ഏകദേശം 0.57 യൂണിറ്റ് വൈദ്യുതി മാത്രമായിരിക്കും. അതായത്, ഒരു മാസത്തെ മൊത്തം ഉപയോഗം ഒരു യൂണിറ്റിൽ താഴെ മാത്രമാണ്. ഒരു യൂണിറ്റ് വൈദ്യുതിക്ക് ശരാശരി എട്ട് രൂപ നിരക്ക് കണക്കാക്കിയാൽ, മാസത്തിൽ ഏകദേശം 4.56 രൂപ (ഏകദേശം അഞ്ച് രൂപ) മാത്രമാണ് ഇതിനായി ചെലവാകുന്നത്. ഇനി ദിവസവും രണ്ടുതവണ ഫോൺ ചാർജ് ചെയ്യുന്നവരാണെങ്കിൽ പോലും മാസബില്ലിൽ ഏകദേശം പത്ത് രൂപയുടെ വർധനവ് മാത്രമേ ഉണ്ടാകൂ.
എങ്കിലും, ഫോൺ ചാർജ് ചെയ്തുകഴിഞ്ഞാലും ചാർജർ സ്വിച്ച് ഓൺ ആക്കി സോക്കറ്റിൽ തന്നെ ഇട്ടിരിക്കുന്നത് ‘സ്റ്റാൻഡ്ബൈ പവർ’ ഉപഭോഗത്തിന് കാരണമാകും. ഇത് ചെറിയ തോതിൽ വൈദ്യുതി നഷ്ടമുണ്ടാക്കുന്നതിനാൽ, ചാർജിങ് പൂർത്തിയായാലുടൻ സ്വിച്ച് ഓഫ് ചെയ്യുകയോ ചാർജർ ഊരിമാറ്റുകയോ ചെയ്യുന്നതാണ് സുരക്ഷയ്ക്കും ഊർജ സംരക്ഷണത്തിനും ഉചിതം. ചുരുക്കത്തിൽ, ഫോൺ ചാർജിങ് കറണ്ട് ബില്ലിനെ കാര്യമായി ബാധിക്കില്ലെങ്കിലും വീട്ടിലെ മറ്റ് ഇലക്ട്രോണിക് ഉപകരണങ്ങളുടെ ഉപയോഗം നിയന്ത്രിക്കുന്നത് ബില്ല് കുറയ്ക്കാൻ സഹായിക്കും.







