ന്യൂഡൽഹി ∙ സ്ത്രീകളുടെ വസ്ത്രം ധരിച്ചെത്തി ഒറ്റയ്ക്ക് യാത്ര ചെയ്യുന്നവരെ കൊള്ളയടിക്കുന്ന സംഘം ഡൽഹി പൊലീസിന്റെ പിടിയിലായി. ആളൊഴിഞ്ഞ റോഡുകളിലൂടെ ഒറ്റയ്ക്ക് വാഹനം ഓടിച്ചുവരുന്നവരെയാണ് സംഘം കെണിയൊരുക്കി പിടികൂടി കവർച്ചയ്ക്ക് ഇരയാക്കുന്നത്. സ്ത്രീ വേഷം ധരിച്ച പുരുഷനാണ് റോഡിൽനിന്നുകൊണ്ട് സഹായം അഭ്യർഥിച്ച് ഡ്രൈവർമാരുടെ ശ്രദ്ധ നേടുന്നത്. തുടർന്ന് വാഹനം നിർത്തുമ്പോൾ ഒളിച്ചിരിക്കുന്ന സഹായികൾ ഇരകളെ ആക്രമിച്ച് പണവും വിലപിടിപ്പുള്ള സാധനങ്ങളും കവരുന്നതാണ് സംഘത്തിന്റെ മോഷണരീതി.
ഉസ്മാൻപുർ, ശാസ്ത്രി പാർക്ക് തുടങ്ങിയ സ്ഥലങ്ങളിൽ പുലർച്ചെ സമാനമായ രീതിയിൽ മോഷണം നടക്കുന്നത് ശ്രദ്ധയിൽപെട്ടതോടെയാണ് പൊലീസ് അന്വേഷണം നടത്തിയത്. മോനു (28), സാഗർ ശർമ (26) എന്നിവരാണ് അറസ്റ്റിലായത്. ഇതിൽ മോനുവാണ് സ്ത്രീ വേഷം ധരിച്ച് വിജനമായ റോഡുകളിൽ നിൽക്കുകയും വാഹനങ്ങൾ കൈകാണിച്ച് നിർത്തുകയും ചെയ്യുന്നത്.
നവംബർ 18 ന് പുലർച്ചെ 4.05 ഓടെ അശോക് വിഹാറിലേക്ക് പ്ലൈവുഡുമായി പോയ വാഹനത്തിലെ ഡ്രൈവർ മോഷണത്തിനു ഇരയായി. മൊബൈൽ ഫോണും 2,500 രൂപയുമാണ് സംഘം കവർന്നത്. തുടർന്ന് ലഭിച്ച പരാതിയിൽ പൊലീസ് നടത്തിയ അന്വേഷണത്തിലാണ് പ്രതികൾ പിടിയിലായത്. സംഘത്തിൽ കൂടുതൽപേർ ഉള്ളതായും പൊലീസ് സംശയിക്കുന്നുണ്ട്.






