69 വർഷം സന്തതസഹചാരിയായിരുന്ന പ്രിയപ്പെട്ട സൈക്കിൾ നഷ്ടപ്പെട്ട ദുഃഖത്തിലാണ് ഇടപ്പള്ളി ടോൾ മാളോത്തുവീട്ടിൽ എം.ബി. പ്രകാശൻ (79). നീണ്ടകാലം ജോലി സ്ഥലത്തും മറ്റിടങ്ങളിലുമെല്ലാം കൃത്യമായി എത്തിച്ച സൈക്കിൾ തന്റെ ജീവിതത്തിന്റെ ഒരു ഭാഗം തന്നെയായിരുന്നുവെന്ന് പ്രകാശൻ പറയുന്നു.

 

പതിവുപോലെ ചൊവ്വാഴ്ച വൈകീട്ട് ടോളിലുള്ള തന്റെ കടയ്ക്കുസമീപം സൈക്കിൾ പൂട്ടിവെച്ചതാണ്, എന്നാൽ താക്കോലെടുക്കാൻ മറന്നു. കുറച്ചുകഴിഞ്ഞ് മഴവരുന്നത് കണ്ട് സൈക്കിൾ എടുത്ത് കടയിലേക്ക് വയ്ക്കാൻ നോക്കിയപ്പോൾ കണ്ടില്ല. താൻ വെച്ചസ്ഥലം മാറിപ്പോയെന്ന് സംശയിച്ച് ചുറ്റുവട്ടത്തെല്ലാം അന്വേഷിച്ചെങ്കിലും കണ്ടെത്താനായില്ല. കുറഞ്ഞ സമയത്തിനുള്ളിൽ സൈക്കിൾ ആരോ മോഷ്ടിച്ചു കൊണ്ടുപോയി.

എം.ജി. റോഡിലെ കവിത സൈക്കിൾ എംപോറിയത്തിൽ നിന്ന് 1957-ൽ അച്ഛൻ എം.ആർ. ബാലകൃഷ്ണനാണ് ഈ റാലി സൈക്കിൾ പത്തുവയസ്സുള്ള പ്രകാശന് വാങ്ങി നൽകിയത്. ഇടപ്പള്ളി ടോൾ ചുറ്റുവട്ടത്തെല്ലാം ഈ സൈക്കിളിലാണ് സഞ്ചരിച്ചിരുന്നത്. അതിന്റെ പെഡലിനൊപ്പമാണ് കഴിഞ്ഞ 69 വർഷം തന്റെ ജീവിതം തിരിഞ്ഞതെന്ന് പ്രകാശൻ പറയും.