പിണങ്ങോട്: നിയന്ത്രണം വിട്ട് വയലിലേക്ക് മറിഞ്ഞ കാറിലകപ്പെട്ട യുവാക്കളെ വൈത്തിരി പോലീസും, നാട്ടുകാരും ചേര്‍ന്ന് രക്ഷപ്പെടുത്തി. എന്നാല്‍ യുവാക്കളുടെ പരിഭ്രമം കണ്ട് സംശയം തോന്നി പരിശോധിച്ചപ്പോള്‍ കാറില്‍ നിന്നുംഎംഡിഎംഎയും, കഞ്ചാവും കണ്ടെത്തി. ഇന്നലെ രാത്രി പിണങ്ങോട് അത്തിമൂല ചാത്തോത്ത് ആണ് സംഭവം നടന്നത്.

വൈത്തിരി എസ്.ഐ സി.കെ ലയമോളും, പ്രൊബോഷന്‍ എസ്.ഐ ലാന്‍സി ദാസും സംഘവുമാണ് കാറിനുള്ളില്‍ നടത്തിയ വിശദമായ പരിശോധനക്കൊടുവില്‍ മയക്കുമരുന്ന് പിടികൂടിയത്.സംഭവവുമായി ബന്ധപ്പെട്ട് പിണങ്ങോട് സ്വദേശികളായ പനന്തറ വീട്ടില്‍ പി.അബ്ദുള്‍ സമദ് (30), ഒട്ടുംപുരംകുന്ന് വണ്ണത്താന്‍ വീട്ടില്‍ വി.വി സൈനുദ്ധീന്‍ (29) എന്നിവരെ അറസ്റ്റ് ചെയ്തു. 1.07 ഗ്രാം എംഡിഎംഎ യും, 0.84 ഗ്രാം കഞ്ചാവുമാണ് പ്രതികള്‍ സഞ്ചരിച്ച കാറില്‍ നിന്നും കണ്ടെടുത്തത്. കെ.എല്‍ 17 എഫ് 8315 നമ്പര്‍ കാറും പോലീസ് കസ്റ്റഡിയിലെടുത്തിട്ടുണ്ട്. ഇവര്‍ക്ക് മയക്കുമരുന്ന് നല്‍കിയ വ്യക്തിയെ കുറിച്ചും പോലീസ് അന്വേഷണം നടത്തി വരുന്നുണ്ട്.