ബെംഗളൂരു ∙ വാരാന്ത്യങ്ങളിലും ഉത്സവ സീസണുകളിലും കേരളത്തിലേക്കുള്ള ട്രെയിനുകളിലെ റിസർവേഷൻ കോച്ചുകളിൽ കയറുന്ന അൺറിസർവ്ഡ് യാത്രക്കാർക്കായി പരിശോധന ശക്തമാക്കി ദക്ഷിണ പശ്ചിമ റെയിൽവേ. കഴിഞ്ഞ ദിവസങ്ങളിൽ കെആർ പുരം റെയിൽവേ സ്റ്റേഷനിൽ മൈസൂരു– തിരുവനന്തപുരം നോർത്ത് എക്സ്പ്രസിലെ സ്ലീപ്പർ കോച്ചുകളിൽ കയറിയ യാത്രക്കാരെ റെയിൽവേ സുരക്ഷ സേനയുടെ നേതൃത്വത്തിൽ പുറത്തിറക്കി. ഉച്ചഭാഷിണി ഉപയോഗിച്ചു മുന്നറിയിപ്പും നൽകി. ഓണത്തിനു നാട്ടിലേക്കു ടിക്കറ്റ് ബുക്ക് ചെയ്തവർക്കു കോച്ചുകൾക്കുള്ളിൽ കയറാൻ പോലും കഴിയാത്ത തരത്തിലാണ് അൺറിസർവ്ഡ് ടിക്കറ്റുകാരുടെ തള്ളിക്കയറ്റം.

 

മാലൂർ, ബംഗാർപേട്ട്, കുപ്പം എന്നിവിടങ്ങളിലേക്കുള്ളവരാണു കൂടുതലായി കയറുന്നത്. തള്ളിക്കയറ്റത്തിൽ മലയാളി സംഘടനകളുടെ നേതൃത്വത്തിൽ ദക്ഷിണ പശ്ചിമ റെയിൽവേ അധികൃതർക്ക് ഒട്ടേറെ തവണ പരാതി നൽകിയിട്ടും നടപടികൾ കാര്യക്ഷമമായിരുന്നില്ല.