ഒന്റാറിയോ∙ പൂജയുടെ മറവിൽ യുവതിയെ ലൈംഗികമായി അതിക്രമിച്ച കേസിൽ അമേരിക്കക്കാരനായ പൂജാരി കാനഡയിൽ അറസ്റ്റിൽ. ന്യൂയോർക്ക് സ്വദേശിയായ രാജേന്ദ്രനാഥ് ദൂദ് നാഥ് മരാജ് (50) ആണ് അറസ്റ്റിലായത്. കാനഡയിലെ ഒന്റാറിയോയിലുള്ള ഓഷവയിലാണ് സംഭവം.

 

വീട്ടിലെ പൂജാകർമ്മങ്ങൾക്കായി യുവതിയുടെ കുടുംബമാണ് ഇയാളെ അമേരിക്കയിൽ നിന്ന് കാനഡയിലെ ഒഷാവയിലേക്ക് ക്ഷണിച്ചുവരുത്തിയത്. യുവതിയുടെ ശരീരത്തിൽ ബാധ കേറിയിട്ടുണ്ടെന്നും ഇത് ഒഴിപ്പിക്കാൻ പ്രത്യേക ചടങ്ങുകൾ നടത്തണമെന്നും വിശ്വസിപ്പിച്ചായിരുന്നു പീഡനം. തുടർന്ന് യുവതിയെ ആളൊഴിഞ്ഞ സ്ഥലത്തേക്ക് കൂട്ടിക്കൊണ്ടുപോയി ലൈംഗികമായി ഉപദ്രവിക്കുകയായിരുന്നുവെന്ന് ഡർഹാം പൊലീസ് വ്യക്തമാക്കി.

 

സംഭവത്തിൽ പരാതി ഉയർന്നതിന് പിന്നാലെ പ്രതിയെ കസ്റ്റഡിയിലെടുത്ത പൊലീസ്, ലൈംഗികാതിക്രമത്തിന് കേസെടുത്ത് കോടതിയിൽ ഹാജരാക്കി. സമാന രീതിയിൽ ഇയാൾ കൂടുതൽ പേരെ വഞ്ചിച്ചിട്ടുണ്ടോ എന്ന് പൊലീസ് സംശയിക്കുന്നുണ്ട്. ഇതുമായി ബന്ധപ്പെട്ട് വിവരങ്ങൾ ഉള്ളവർ പൊലീസുമായി ബന്ധപ്പെടണമെന്ന് അധികൃതർ അഭ്യർഥിച്ചു.