തളിപ്പറമ്പ്: കണ്ണൂര്‍ ശ്രീകണ്ഠാപുരത്ത് യുവതിയുടെ നഗ്‌ന ചിത്രം പകര്‍ത്തിയ സംഭവത്തില്‍ എസ്എഫ്‌ഐ നേതാവിനെതിരെ നടപടി. ചിത്രം പകര്‍ത്തിയ ചുഴലി സ്വദേശി നവനീതിനെ പാര്‍ട്ടി അംഗത്വത്തില്‍ നിന്നും എസ്എഫ്‌ഐ ഭാരവാഹിത്വത്തില്‍ നിന്നും പുറത്താക്കി.

 

നവനീതിനെതിരായ നടപടി 22ന് തന്നെ സ്വീകരിച്ചതായി സിപിഎം അറിയിച്ചു. തെറ്റായ നടപടികള്‍ പാര്‍ട്ടിയും സമൂഹവും അംഗീകരിക്കില്ലെന്നും സിപിഎം പറഞ്ഞു.

 

യുവതിയുടെ കുടുംബത്തിന്റെ പരാതിയില്‍ നവനീതിനെതിരെ ശ്രീകണ്ഠാപുരം പൊലീസ് കേസെടുത്തിരുന്നു. എന്നാല്‍ നിസാര വകുപ്പുകള്‍ ചുമത്തിയാണ് കേസെടുത്തതെന്ന് യുവതി ആരോപിച്ചു. ശ്രീകണ്ഠാപുരം പൊലീസ് പരാതി ഗൗരവത്തിലെടുത്തില്ലെന്ന് ചൂണ്ടിക്കാട്ടി യുവതി ആഭ്യന്തരമന്ത്രിയെയും സമീപിച്ചിരുന്നു.

 

ആഗസ്റ്റ് 20നാണ് കേസിനാസ്പദമായ സംഭവം നടന്നത്. കുളിക്കുന്നതിനിടെയാണ് പ്രതി യുവതിയുടെ നഗ്‌ന ദൃശ്യങ്ങള്‍ പകര്‍ത്തിയത്. മൊബൈലിന്റെ ഫ്ലാഷ് തനിയെ ഓണായതോടെ യുവതി ഫോണ്‍ കാണുകയും ബഹളം വെക്കുകയുമായിരുന്നു.