ചെന്നൈ∙ തമിഴ്നാട്ടിലെ പൊന്നേരി സർക്കാർ ആശുപത്രിയിലെ ജീവനക്കാരിയെ പെട്രോൾ ഒഴിച്ച് കത്തിച്ച യുവാവിനെ വെടിവച്ച് വീഴ്ത്തി പൊലീസ്. ആശുപത്രിയിൽ ഡേറ്റ എൻട്രി ഓപ്പറേറ്ററായി ജോലി ചെയ്യുന്ന രാജേശ്വരിയെ (24) ആണ് തിങ്കളാഴ്ച രാത്രി ഏഴരയോടെ കാഷ്വൽറ്റി വാർഡിനു സമീപത്തുവച്ച് പ്രകാശ് (35) പെട്രോൾ ഒഴിച്ചു തീകൊളുത്തിയത്. ഡ്യൂട്ടി കഴിഞ്ഞു പുറത്തേക്കു വരുമ്പോഴാണ് യുവാവ് ഓടിയെത്തി പെട്രോൾ ഒഴിച്ച് കത്തിച്ചത്. മുഖത്തും നെഞ്ചിലും അടിവയറ്റിലും പൊള്ളലേറ്റ രാജേശ്വരി കിൽപോക്ക് മെഡിക്കൽ കോളജ് ആശുപത്രിയിൽ ചികിത്സയിലാണ്. രാജേശ്വരിക്ക് 48 ശതമാനത്തിലധികം പൊള്ളലേറ്റിട്ടുണ്ട്.

 

രാജേശ്വരിയെ ആക്രമിച്ചശേഷം പ്രകാശ് സ്ഥലത്തുനിന്നു രക്ഷപ്പെട്ടു. സിസിടിവി ദൃശ്യങ്ങൾ പരിശോധിച്ച് അന്വേഷണം ആരംഭിച്ച പൊലീസ് ഇന്ന് രാവിലെയാണ് പ്രകാശിനെ ചെന്നൈയിലെ മാധവാരത്തിനു സമീപത്തുവച്ച് പിടികൂടിയത്. കാലിൽ വെടിവച്ചു വീഴ്ത്തിയാണ് ഇയാളെ കസ്റ്റഡിയിൽ എടുത്തത്.