മുംബൈ ∙ മുംബൈ റാം മന്ദിർ റെയിൽവേ സ്റ്റേഷനു സമീപത്തുള്ള ശിവശങ്കർ നഗറിലെ പൊതു ശുചിമുറിയിൽ രണ്ടു പേരെ മരിച്ച നിലയിൽ കണ്ടെത്തി. ഇന്ന് പുലർച്ചെ 2.30 ഓടെയാണ് ഭവിൻ ദേശായി (18), പ്രഭാകർ ധനിവർ (25) എന്നിവരെ മരിച്ച നിലയിൽ കണ്ടെത്തിയത്. വിഷവാതകം ശ്വസിച്ചാണ് യുവാക്കൾ മരിച്ചതെന്നാണ് സംശയിക്കുന്നത്. സംഭവത്തിൽ ശുചിമുറിക്ക് സമീപത്തായി പ്രവർത്തിക്കുന്ന പ്ലേറ്റിങ് വർക്‌ഷോപ്പിൽ നിന്നും വാതകചോർച്ച ഉണ്ടായിട്ടുണ്ടോ എന്ന് പൊലീസ് സംശയിക്കുന്നു.

 

സുഹൃത്തുക്കൾക്കൊപ്പം ഭക്ഷണം കഴിച്ചു വരുമ്പോഴാണ് ദേശായിയും ധനിവറും പൊതുശുചിമുറിയിൽ കയറിയത്. എന്നാൽ ഏറെ നേരം കഴിഞ്ഞിട്ടും യുവാക്കൾ തിരികെ വരാതായതോടെ സുഹൃത്തുക്കൾ ശുചിമുറികളുടെ വാതിൽ തള്ളിത്തുറന്ന് പരിശോധിച്ചപ്പോൾ രണ്ടു പേരെയും അബോധാവസ്ഥയിൽ കണ്ടു. ഉടൻ സമീപത്തുള്ള ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. സംഭവത്തിൽ പൊലീസ് അന്വേഷണം ആരംഭിച്ചു.