ദമാസ്കസ് (സിറിയ)∙ പള്ളിയിൽ പ്രാർഥനയ്‌ക്കെത്തിയവരുടെ ചെരുപ്പുകൾ മോഷ്ടിച്ച് വസ്ത്രത്തിനുള്ളിൽ ഒളിപ്പിച്ചു കടത്താൻ ശ്രമിച്ചയാൾ ക്യാമറയിൽ കുടുങ്ങി. സിറിയൻ തലസ്ഥാനമായ ദമാസ്കസിലെ അൽ മിദാൻ മേഖലയിലെ പള്ളിയിലാണ് അപൂർവ സംഭവം നടന്നതെന്ന് റിപ്പോർട്ട്.

 

പള്ളിയുടെ പുറത്തുവച്ചിരുന്ന ഒട്ടേറെയാളുകളുടെ ചെരുപ്പുകൾ എടുത്ത ശേഷം ഇയാൾ ഇട്ടിരുന്ന പാന്റ്സിനുള്ളിൽ ഒളിപ്പിക്കുന്ന ദൃശ്യങ്ങളാണ് സിസിടിവി ക്യാമറയിൽ പതിഞ്ഞത്. മോഷണത്തിന്റെ വ്യത്യസ്തമായ രീതി സമൂഹമാധ്യമത്തിൽ പ്രചരിച്ചതോടെ വലിയ ചർച്ചയായിട്ടുണ്ട്. സംഭവത്തിൽ നിരവധി പേരാണ് പരിഹാസവും അമർഷവും രേഖപ്പെടുത്തി രംഗത്തെത്തിയത്. സംഭവം ശ്രദ്ധയിൽപ്പെട്ട പ്രദേശവാസികൾ പിന്നീട് സംശയകരമായ സാഹചര്യത്തിൽ കണ്ട പ്രതിയെ പിടികൂടി പൊലീസിന് കൈമാറി.

 

എന്നാൽ സംഭവത്തിൽ സിറിയൻ ഭരണകൂടം ഔദ്യോഗികമായി ഇതുവരെ വിവരങ്ങളൊന്നും പുറത്തുവിട്ടിട്ടില്ല. പ്രാർഥനാ സമയങ്ങളിൽ പള്ളികൾക്ക് പുറത്ത് വയ്ക്കുന്ന ചെരുപ്പുകൾ മോഷ്ടിക്കപ്പെടുന്നത് തടയാൻ കർശന നടപടി വേണമെന്ന് ആവശ്യപ്പെട്ട് വലിയ ചർച്ചകളാണ് ഇപ്പോൾ ഓൺലൈനിൽ നടക്കുന്നത്.