ന്യൂയോർക്ക്∙ ദുബായില്‍നിന്ന് ഇസ്രയേലിലെ ടെൽ അവീവിലേക്ക് പോയ ഫ്ലൈദുബായ് വിമാനത്തിൽ ആക്രമണം നടത്തിയ സഹപൈലറ്റിന്റെ വിവരങ്ങൾ പുറത്തുവിട്ട് സിഎൻഎൻ. റിപ്പോർട്ടുകൾ പ്രകാരം, ഹമാം അൽ-ഹമ്മാമി എന്ന ഒമാൻ പൗരനാണ് ആക്രമി. ഇയാളുടെ പിതാവ് ഒമാൻ സ്വദേശിയാണ്. മാതാവ് സിറിയക്കാരിയാണ്. യുഎഇയിലായിരുന്നു ഹമാം ജനിച്ചത്.

 

ഹമ്മാമി ഏഴ് വർഷം ഒമാൻ എയറിൽ ജോലി ചെയ്തിരുന്നെന്നാണ് ലിങ്ക്ഡ്ഇൻ പ്രൊഫൈലിൽ പറയുന്നത്. 2025 ഫെബ്രുവരിയിലാണ് ആ ജോലിയിൽനിന്നു മാറിയത്. പിന്നാലെ 2025 ജൂണിൽ റോയൽ എയർ മറോക്കിൽ ചേർന്നു. 2026 ജനുവരിയിൽ ആ ജോലിയും അവസാനിപ്പിച്ചു. എന്നാൽ ഫ്ലൈദുബായിൽ ജോലിക്കു ചേർന്ന വിവരം പേജിൽ അപ്ഡേറ്റ് ചെയ്തിട്ടില്ല. നിലവിൽ ഈ പേജ് നീക്കം ചെയ്തിട്ടുണ്ടെന്നും സിഎൻഎൻ റിപ്പോർട്ട് ചെയ്തിട്ടുണ്ട്.

 

തീവ്ര നിലപാടുകളുള്ള വ്യക്തിയായതിനാൽ ഹമ്മാമിനെ വിമാന പരിശീലനത്തിൽനിന്ന് ഒഴിവാക്കുകയും ഒമാന്റെ ദേശീയ വിമാനക്കമ്പനിയിൽ മറ്റൊരു ചുമതല നൽകുകയും ചെയ്തു എന്ന് നയതന്ത്രജ്ഞൻ വ്യക്തമാക്കിയെന്നും സിഎന്‍എൻ റിപ്പോർട്ട് ചെയ്യുന്നു.

 

8 മാസം മുൻപാണ് ഹമ്മാമി ഫ്ലൈദുബായിൽ ജോലിക്കു കയറിയത്. പുറത്തുവന്ന വിവരത്തെ കുറിച്ചു കൂടുതൽ പ്രതികരണത്തിനായി ഒമാൻ എയർ, റോയൽ എയർ മറോക്ക്, ദുബായ് സർക്കാർ എന്നിവരുമായി ബന്ധപ്പെട്ടെന്നും സിഎൻഎൻ പറയുന്നു. അന്വേഷണം നടക്കുന്നതു കൊണ്ട് കൂടുതൽ വിവരങ്ങൾ വ്യക്തമാക്കാനാകില്ലെന്നാണ് ഫ്ലൈദുബായ് പ്രതികരിച്ചതെന്നും റിപ്പോർട്ടിൽ പറയുന്നു.