പാലക്കാട് ∙ ബവ്കോയിൽ വിലകുറഞ്ഞ മദ്യത്തിനു ക്ഷാമം. വൻകിട കമ്പനികളുടെ മദ്യം വെയർഹൗസുകളിൽ നിറഞ്ഞിരിക്കുന്നതു മൂലം ചെറുകിട കമ്പനികളുടെ മദ്യം ഇറക്കാനാ‍കാത്ത സ്ഥിതിയാണെന്നാണു സൂചന. കഴിഞ്ഞ ദിവസത്തെ യോഗത്തിൽ എക്സൈസ് മന്ത്രിക്കു മുന്നിൽ കേരള ഡിസ്റ്റിലറീസ് ആൻഡ് സപ്ലയേഴ്സ് അസോസിയേഷൻ വിഷയം അവതരിപ്പിച്ചിട്ടുണ്ട്.

 

സംസ്ഥാനത്ത് 28 വെയർഹൗസുകളും 289 ചില്ലറ വിൽപനശാലകളുമാണുള്ളത്. വെയർഹൗസുകളിലെല്ലാം ചില കമ്പനികളുടെ മദ്യം മാത്രമാണു നിറച്ചിരിക്കുന്നതെന്നാണു പരാതി. കംപ്യൂട്ടർ സംവിധാനം വഴിയാണു സ്റ്റോക്ക് ആവശ്യപ്പെടുന്നത്. ഇതിലെ പഴുതുകൾ ഉപയോഗപ്പെടുത്തി ചില കമ്പനികൾക്കു ചിലർ സൗകര്യം ചെയ്തുകൊടുക്കുകയാണെന്ന് ആരോപണം ഉയർന്നിട്ടുണ്ട്.

 

‌21 വെയർഹൗസുകളിൽ രണ്ടു ദിവസമായി മദ്യം ഇറക്കാനുള്ള പെർമിറ്റ് അനുവദിക്കുന്നില്ല. അത്രയും നിറഞ്ഞിരിക്കുകയാണു സ്റ്റോക്ക്. എത്തിച്ച ലോഡ് ഇറക്കാൻ ചിലയിടങ്ങളിൽ ഒന്നും രണ്ടും ദിവസം കാത്തുകിടക്കേണ്ടി വരുന്നതിനാൽ ഉള്ള ഓർഡർ പോലും അയയ്ക്കാൻ കഴിയാത്ത സ്ഥിതിയിലാണു ചെറുകിട കമ്പനികൾ. ഉപഭോക്താക്കൾക്കു താൽപര്യമുള്ള വില കുറഞ്ഞ മദ്യമാണ് ഇതുവഴി കിട്ടാതായിരിക്കുന്നത്. ഇതുമൂലം ബവ്‌കോക്കും സർക്കാരിനും വൻ സാമ്പത്തിക നഷ്ടമാണു സംഭവിച്ചുകൊണ്ടിരിക്കുന്നത്.