ഇൻഡോർ ∙ മധ്യപ്രദേശിലെ ഉജ്ജ്വയിൻ മുനിസിപ്പൽ കോർപ്പറേഷനിലെ ഉദ്യോഗസ്ഥന്റെ തായ്‌ലൻഡ് യാത്ര വിവാദമായി. വിദേശ പര്യടനത്തിനു അനുമതി വാങ്ങാതെയാണ് രാജ്കുമാർ റാത്തോഡ് ഭാര്യയ്ക്കൊപ്പം തായ്‌ലൻഡിലേക്ക് സന്ദർശനത്തിനു പോയത്. എന്നാൽ തയ്‌ലൻഡിൽ വച്ച് റാത്തോഡിന്റെ ഭാര്യ മുതല ഇറച്ചിയുമായി നിൽക്കുന്ന വിഡിയോ പങ്കുവച്ചിരുന്നു.

 

“തായ്‌ലൻഡിൽ ആദ്യമായി മുതല ഇറച്ചി പരീക്ഷിക്കുന്നു” എന്ന അടിക്കുറിപ്പോടെ പോസ്റ്റ് ചെയ്ത വിഡിയോ സമൂഹമാധ്യമങ്ങളിൽ വൈറലാകുകയും ചെയ്തു. ഇതോടെയാണ് റാത്തോഡ് വിദേശയാത്ര നടത്തിയെന്ന് ഓഫിസിലുള്ളവർക്ക് മനസ്സിലായത്. തുടർന്ന് റാത്തോഡ് തിരിച്ചെത്തിയപ്പോൾ മേലധികാരികൾ കാരണം കാണിക്കൽ നോട്ടിസ് നൽകി.

 

ഉജ്ജൈൻ മുനിസിപ്പൽ കോർപ്പറേഷനിലെ 1, 2, 3 സോണുകളിലെ ബിൽഡിങ് ഓഫിസറാണ് റാത്തോഡ്. അതേസമയം ഒക്ടോബർ 19 മുതൽ 23 വരെ റാത്തോഡ് അവധിയെടുത്തിരുന്നുവെന്ന് മുനിസിപ്പൽ കമ്മിഷണർ പറഞ്ഞു. എന്നാൽ അവധി അപേക്ഷയിൽ വിദേശ യാത്രയെ കുറിച്ച് വെളിപ്പെടുത്തിയിരുന്നില്ല. വിശദീകരണം തൃപ്തികരമല്ലെങ്കിൽ റാത്തോഡിനു വകുപ്പുതല നടപടികൾ നേരിടേണ്ടി വരും.