spotnewswebsite@gmail.com
മലയാളത്തിനൊപ്പം മറ്റ് തെന്നിന്ത്യന്‍ സിനിമകളിലും സാന്നിധ്യമറിയിച്ച നടിയാണ് ഷംന കാസിം. ഈയ്യടുത്തിറങ്ങിയ ജയിലര്‍ 2വിലെ ഷംനയുടെ ഡാന്‍സ് നമ്പര്‍ വൈറലായിരുന്നു. അതേസമയം തനിക്ക് പലപ്പോഴും ബോഡി ഷെയ്മിങ് നേരിടേണ്ടി വരുന്നുണ്ടെന്നാണ് ഷംന കാസിം പറയുന്നത്. നേരത്തെ മഹേഷ് ബാബു ചിത്രത്തിലെ പാട്ട് പുറത്തിറങ്ങിയതിന് പിന്നാലെയും ബോഡി ഷെയ്മിങ് നേരിട്ടിരുന്നുവെന്ന് ഷംന പറയുന്നു.
മനോരമ ന്യൂസിനോടായിരുന്നു ഷംനയുടെ പ്രതികരണം. എന്നാല്‍ വണ്ണവും ഡാന്‍സും തമ്മില്‍ ബന്ധമില്ലെന്നും ഗ്രേസോടെ ഡാന്‍സ് ചെയ്യാന്‍ വണ്ണം തടസമല്ലെന്നും ഷംന പറയുന്നു. കമന്റ് ചെയ്യുന്നത് ആളുകളുടെ ഇഷ്ടമാണെന്നും അത് ഗൗനിക്കുന്നില്ലെന്നും ഷംന പറയുന്നു. ആ വാക്കുകളിലേക്ക്:
ഡാന്‍സര്‍ എന്ന് പറയുമ്പോള്‍ ശരീരം ഫിറ്റായിരിക്കണം. കുര്‍ച്ചി മടത്തപ്പെട്ടി പാട്ടില്‍ ഇതിലും വണ്ണമുണ്ടായിരുന്നു. അന്ന് ആ പാട്ട് റിലീസാകുമ്പോള്‍ ബോഡി ഷെയ്മിങ് പ്രതീക്ഷിച്ചിരുന്നു. പക്ഷെ അതെല്ലാം തകര്‍ത്തു കൊണ്ട് ആളുകള്‍ പാട്ട് ആസ്വദിച്ചു. ഡാന്‍സര്‍ ആയാലും, ഏത് വ്യക്തിയായാലും വണ്ണം എന്നത് വേറൊന്നു തന്നെയാണ്. നമ്മള്‍ ക്യാരിയൗട്ട് ചെയ്യുന്ന രീതിയാണ് പ്രധാനം. ചിലര്‍ പറയും സ്ലിമ്മായിരിക്കണമെന്ന്. പക്ഷെ അണ്‍ഹെല്‍ത്തിയായിട്ട് സ്ലിം ആയിട്ട് എന്താണ് കാര്യം? നമ്മുടെ ഗ്രേസ് വിട്ടിട്ടുള്ള ശരീരത്തിലേക്ക് പോകാന്‍ എനിക്ക് താല്‍പര്യമില്ല.
പിന്നെ എനിക്ക് കുട്ടികളൊക്കെയായി. എല്ലാം മാറും. അതെല്ലാവര്‍ക്കും അറിയാവുന്ന കാര്യമാണ്. അപ്പോള്‍ പറയും ഉത്തരേന്ത്യയിലെ നടിമാരൊക്കെ അതുപോലെ ഇരിക്കുന്നുവെന്ന്. അവരുടെ ജീവിതരീതി വേറെയാണ്. കേരളത്തിലെ ജീവിത രീതി വേറെയാണ്. ബോഡി ഷെയ്മിങ് കമന്റുകള്‍ വായിച്ചിരുന്നു. എന്നെ പന്നി എന്ന് വിളിച്ചിരുന്നു, കുര്‍ച്ചി മടത്തപ്പെട്ടി സമയത്ത്. അവരൊക്കെ ആലോചിക്കേണ്ടത് കല്യാണം കഴിച്ച് കുട്ടികളൊക്കെയാകുമ്പോള്‍ മാറ്റം വരും. നമുക്ക് ഗ്രേസ് ആണ് വേണ്ടത്. ഡാന്‍സായാലും, എന്തായാലും ശരീര വണ്ണം വിഷയമേയല്ല. പെര്‍ഫോമന്‍സിനെ അത് ബാധിക്കില്ല.
ചിലപ്പോള്‍ സ്റ്റാമിനയെ ബാധിച്ചേക്കും. ഞാനിപ്പോള്‍ കുറച്ച് ഡയറ്റ് നോക്കുന്നുണ്ട്. മെലിയാനല്ല. സ്‌റ്റേജില്‍ കയറാനുള്ള സ്റ്റാമിനയ്ക്ക് വേണ്ടി. പഴയത് പോലെ അഞ്ച് മിനുറ്റ് ഡാന്‍സ് കളിക്കണമെങ്കില്‍ സ്റ്റാമിന വേണം. അതിന് കുറച്ച് വണ്ണം കുറയ്‌ക്കേണ്ടി വരും. ചിലപ്പോള്‍ മുട്ടുവേദനയുണ്ടെങ്കില്‍ വണ്ണം കുറയ്ക്കണമെന്ന് ഡോക്ടര്‍ പറയും. അതൊക്കെ ഓക്കെയാണ്. അവരവരുടെ ചോയ്‌സ് ആണ്. കമന്റെന്നത് ആളുകളുടെ ഇഷ്ടമാണ്. അവര്‍ക്കെന്തും പറയാം.
