ഫോൺ പെട്ടെന്ന് സ്വിച്ച് ഓഫ് ആകുന്നു; പിന്നാലെ സ്‌ക്രീനിൽ ‘സിസ്റ്റം അപ്‌ഡേറ്റ്’ എന്ന മുന്നറിയിപ്പ്! ഫോൺ ഓണാക്കാനോ ആപ്പുകൾ നിയന്ത്രിക്കാനോ കഴിയാത്ത ആ സമയത്തിനുള്ളിൽ അക്കൗണ്ടിലേക്ക് പണം വരുന്നതും അത് നിമിഷനേരം കൊണ്ട് അന്യരുടെ അക്കൗണ്ടുകളിലേക്ക് ചോർന്നുപോകുകയും ചെയ്യുന്നു…? സ്മാർട്ട്‌ഫോൺ ഉപയോക്താക്കൾ അറിഞ്ഞിരിക്കേണ്ട പുതിയ സൈബർ ഭീഷണിയുടെ നേർക്കാഴ്ചയാണിത്.നിരവധി ആളുകൾ സോഷ്യൽ മീഡിയയിൽ ഈ തട്ടിപ്പിനെക്കുറിച്ച് പങ്കുവയ്ക്കുന്നുണ്ട്,.

 

ഇന്ന് ഡിജിറ്റൽ ഇടപാടുകൾക്കായി നാം ഏറ്റവും കൂടുതൽ ആശ്രയിക്കുന്ന ഒന്നാണ് ഗൂഗിൾ പേഉൾപ്പെടെയുള്ള യുപിഐ ആപ്പുകൾ. എന്നാൽ ഡിജിറ്റൽ സുരക്ഷയെ വെല്ലുവിളിച്ചുകൊണ്ട് ഫോൺ വിദൂരമായി നിയന്ത്രിച്ച് അക്കൗണ്ട് കാലിയാക്കുന്ന തട്ടിപ്പുകൾ വ്യാപകമാവുകയാണ്. തേർഡ് പാർട്ടി ആപ്പുകളുടെ ഉപയോഗവും സുരക്ഷാ വീഴ്ചകളും ഉപയോക്താക്കളെ എങ്ങനെയാണ് കുരുക്കിലാക്കുന്നത് എന്ന് വ്യക്തമാക്കുന്നതാണ് സമാനമായ അനുഭവങ്ങൾ.

 

എങ്ങനെയാണ് ഈ തട്ടിപ്പ് നടക്കുന്നത്?

ഫോൺ ലോക്ക് ചെയ്യപ്പെടൽ: മാൽവെയറുകളോ സ്പൈവെയറുകളോ അടങ്ങിയ തേർഡ് പാർട്ടി ആപ്പുകൾ അല്ലെങ്കിൽ അപരിചിത ലിങ്കുകൾ വഴി ഹാക്കർമാർ ഫോണിന്റെ നിയന്ത്രണം വിദൂരമായി ഏറ്റെടുക്കുന്നു.

 

ഫേക്ക് സിസ്റ്റം അപ്‌ഡേറ്റ്: ഫോൺ സാധാരണ രീതിയിൽ പ്രവർത്തിക്കാൻ അനുവദിക്കാതെ ‘സിസ്റ്റം അപ്‌ഡേറ്റ്’ എന്ന വ്യാജ സ്ക്രീൻ കാണിച്ച് ഉപയോക്താവിനെ ആശയക്കുഴപ്പത്തിലാക്കുന്നു. ഈ സമയത്ത് ബാക്ക്ഗ്രൗണ്ടിൽ തട്ടിപ്പുകാർ ഫോണിലെ വിവരങ്ങളും യുപിഐ (UPI) ആപ്പുകളും നിയന്ത്രിക്കാൻ തുടങ്ങും.

 

പണം കൈമാറ്റം: ജിപേ (GPay) പോലുള്ള ആപ്പുകൾ വഴി ഉപയോക്താവിന്റെ അക്കൗണ്ട് ഉപയോഗിച്ച് പണം കൈമാറ്റം ചെയ്യുകയോ മറ്റ് അക്കൗണ്ടുകളിൽ നിന്ന് പണം എത്തിച്ച് നിമിഷനേരംകൊണ്ട് മുങ്ങുകയോ ചെയ്യുന്നു. അക്കൗണ്ടിൽ പണം ഇല്ലെങ്കിൽ പോലും വായ്പയോ ക്രെഡിറ്റോ എടുത്ത് തട്ടിപ്പ് നടത്തുന്ന സംഘങ്ങളും സജീവമാണ്.

 

സമാനമായ മറ്റ് ഡിജിറ്റൽ തട്ടിപ്പുകൾ

സ്ക്രീൻ ഷെയറിങ് ആപ്പ് തട്ടിപ്പ് (AnyDesk / TeamViewer): ബാങ്ക് ജീവനക്കാരെന്ന വ്യാജേന വിളിച്ച് അടിയന്തിരമായി ഏതെങ്കിലും ആപ്പ് ഡൗൺലോഡ് ചെയ്യാൻ ആവശ്യപ്പെടുകയും, അതുവഴി ഫോണിന്റെ പൂർണ്ണ നിയന്ത്രണം കൈക്കലാക്കി പണം തട്ടിയെടുക്കുന്ന രീതി.

 

ഫേക്ക് അപ്‌ഡേറ്റ് ലിങ്കുകൾ: എസ്എംഎസ് വഴിയോ വാട്സാപ്പ് വഴിയോ വരുന്ന ലിങ്കുകൾ ക്ലിക്ക് ചെയ്ത് ഫാസ്റ്റ് ടാഗ്, കെഎസ്ഇബി ബിൽ അല്ലെങ്കിൽ സിസ്റ്റം അപ്‌ഡേറ്റ് ചെയ്യുമ്പോൾ ഫോൺ ഹാക്കാകുന്ന രീതി.

 

ലോൺ ആപ് കെണികൾ: ചെറിയ ആവശ്യങ്ങൾക്കായി ഡൗൺലോഡ് ചെയ്യുന്ന തേർഡ് പാർട്ടി ലെൻഡിങ് ആപ്പുകൾ കോൺടാക്റ്റുകളും ഗാലറിയും ചോർത്തി ഭീഷണിപ്പെടുത്തി പണം തട്ടുന്ന തട്ടിപ്പുകൾ.

 

ഇത്തരം പ്രശ്നങ്ങൾ ശ്രദ്ധയിൽപ്പെട്ടാൽ ഉടൻ ചെയ്യേണ്ട കാര്യങ്ങൾ:

ആരെങ്കിലും ഇത്തരം തട്ടിപ്പുകൾക്ക് ഇരയാവുകയോ ഫോൺ അസാധാരണമായി പെരുമാറുന്നത് ശ്രദ്ധയിൽപ്പെടുകയോ ചെയ്താൽ താഴെ പറയുന്ന നടപടികൾ ഉടൻ തന്നെ സ്വീകരിക്കണം:

 

GPay / UPI ആപ്പുകളിൽ റിപ്പോർട്ട് ചെയ്യുക: ഉടൻ തന്നെ ഗൂഗിൾ പേ കസ്റ്റമർ കെയറിലോ ബന്ധപ്പെട്ട യുപിഐ ആപ്പ് ആപ്ലിക്കേഷന്റെ സപ്പോർട്ട് വിഭാഗത്തിലോ വിളിച്ച് അക്കൗണ്ട് താൽക്കാലികമായി ബ്ലോക്ക് ചെയ്യുകയോ ഇടപാടുകൾ മരവിപ്പിക്കുകയോ ചെയ്യുക.

 

ബാങ്കുമായി ബന്ധപ്പെടുക: ബാങ്കിന്റെ ഹെൽപ്‌ലൈനിൽ വിളിച്ച് അക്കൗണ്ട് വിവരങ്ങൾ സുരക്ഷിതമാക്കാനും സംശയാസ്പദമായ ഇടപാടുകൾ തടയാനും ആവശ്യപ്പെടുക.

 

സൈബർ സെൽ / ക്രൈം സ്റ്റോപ്പർ (Cyber Cell / 1930): ദേശീയ സൈബർ ഹെൽപ്‌ലൈൻ നമ്പറായ 1930-ൽ ഉടൻ വിളിക്കുകയോ അല്ലെങ്കിൽ cybercrime.gov.in എന്ന ഔദ്യോഗിക വെബ്‌സൈറ്റ് വഴി പരാതി റജിസ്റ്റർ ചെയ്യുകയോ ചെയ്യുക. എത്രയും വേഗം റിപ്പോർട്ട് ചെയ്താൽ നഷ്ടപ്പെട്ട തുക തിരിച്ചുപിടിക്കാൻ സാധ്യത കൂടുതലാണ്.

 

പൊലീസിൽ പരാതി നൽകുക: പ്രാദേശിക സൈബർ പോലീസിലോ അടുത്തുള്ള സ്റ്റേഷനിലോ പരാതി നൽകി ഔദ്യോഗിക നടപടികൾ സ്വീകരിക്കുക.

 

ശ്രദ്ധിക്കേണ്ട മുൻകരുതലുകൾ:

 

ഔദ്യോഗിക പ്ലേ സ്റ്റോർ അല്ലാത്തവിടങ്ങളിൽ നിന്നോ അപരിചിതമായ ലിങ്കുകളിൽ നിന്നോ യാതൊരു കാരണവശാലും തേർഡ് പാർട്ടി ആപ്പുകൾ ഡൗൺലോഡ് ചെയ്യരുത്.

 

ഫോണിൽ പെട്ടെന്ന് അസാധാരണമായ പ്രവർത്തനങ്ങൾ കണ്ടാൽ (ഫോൺ തനിയെ ഓഫ് ആകുക, ആപ്പുകൾ തുറക്കപ്പെടുക) ഉടൻ ഇന്റർനെറ്റ് കണക്ഷൻ ഓഫ് ചെയ്യുകയോ സിം കാർഡ് ഊരിമാറ്റുകയോ ചെയ്യുക.