മിസോറി∙ നിർത്തിയിട്ടിരുന്ന കാർ കുളത്തിലേക്ക് മറിഞ്ഞ് മൂന്നുവയസ്സുകാരി അപകടത്തിൽപ്പെട്ടു. ഒപ്പമുണ്ടായിരുന്ന നാട്ടുകാരുടെ സമയോചിതമായ ഇടപെടൽ മൂലമാണ് കുട്ടി തലനാരിഴയ്ക്ക് രക്ഷപ്പെട്ടത്. യുഎസിലെ മിസോറിയിലുള്ള സെന്റ് പീറ്റേഴ്സിൽ വ്യാഴാഴ്ച രാവിലെയോടെയായിരുന്നു നാടകീയ സംഭവങ്ങൾ അരങ്ങേറിയത്.

 

മേഗൻ കോൾഹാസ് എന്ന യുവതി തന്റെ ജിഎംസി യൂക്കോൺ കാർ കുളത്തിന് സമീപം നിർത്തിയിട്ട ശേഷം മറ്റു മൂന്ന് മക്കളെ സ്കൂൾ ബസ് കയറ്റിവിടാൻ പോയപ്പോഴായിരുന്നു അപകടം. ഈ സമയം മൂന്നുവയസ്സുകാരിയായ മകൾ മാത്രമാണ് വാഹനത്തിനുള്ളിൽ ഉണ്ടായിരുന്നത്. കുട്ടി അബദ്ധത്തിൽ വാഹനത്തിന്റെ ഗിയർ മാറ്റിയിട്ടതാകാം കാർ മുന്നോട്ട് നീങ്ങി വെള്ളത്തിലേക്ക് മറിയാൻ കാരണമെന്നാണ് പൊലീസിന്റെ പ്രാഥമിക നിഗമനം.

 

കാർ കുളത്തിലേക്ക് നീങ്ങുന്നത് കണ്ട് അമ്മയും മക്കളും നിലവിളിച്ചെങ്കിലും വാഹനം വേഗത്തിൽ വെള്ളത്തിൽ മുങ്ങുകയായിരുന്നു. ബഹളം കേട്ട് ഉടൻതന്നെ സംഭവസ്ഥലത്തേക്ക് ഓടിയെത്തിയ നാട്ടുകാർ കാറിന്റെ ചില്ലുകൾ തകർത്ത് കുട്ടിയെ സുരക്ഷിതമായി പുറത്തെടുത്തു. കാർ പൂർണമായും വെള്ളത്തിനടിയിലാകുന്നതിന് തൊട്ടുമുമ്പുള്ള നിമിഷങ്ങളിലായിരുന്നു ഈ മിന്നൽ രക്ഷാപ്രവർത്തനം.

 

അപകടത്തെത്തുടർന്ന് കുട്ടിയെ കൂടുതൽ പരിശോധനകൾക്കായി ആശുപത്രിയിലേക്ക് മാറ്റി. സംഭവത്തിനിടെ അമ്മ മേഗന്റെ കാലിന് പരുക്കേറ്റിട്ടുണ്ട്. മകളുടെ ജീവൻ തിരികെ നൽകിയ നാട്ടുകാർക്ക് കുടുംബം നന്ദി അറിയിച്ചു. സംഭവത്തിൽ പ്രാദേശിക പൊലീസ് അന്വേഷണം തുടരുകയാണ്.