‘വർഷം ഒരു കോടി രൂപ ശമ്പളം!’ – ഇന്ത്യയിലിരുന്ന് ഈ കണക്ക് കേൾക്കുമ്പോൾ ആരുടെയും കണ്ണൊന്ന് തള്ളും. ആഡംബര ജീവിതവും വലിയ സമ്പാദ്യവുമൊക്കെയാകും മനസ്സിലേക്ക് ഓടിയെത്തുക. എന്നാൽ യുഎസിൽ താമസിക്കുന്ന മഹിമ രതി എന്ന ഇന്ത്യൻ യുവതിയുടെ വെളിപ്പെടുത്തൽ ഈ ധാരണകളെയെല്ലാം പൊളിച്ചെഴുതുകയാണ്.

 

വർഷം ഏകദേശം ഒരു കോടി രൂപ (പ്രതിമാസം 8,000 ഡോളർ അഥവാ 7.5 ലക്ഷം രൂപ) സമ്പാദിച്ചിട്ടും താൻ ഇപ്പോഴും ഒരു സാധാരണ ‘മിഡിൽ ക്ലാസ്’ ജീവിതമാണ് നയിക്കുന്നതെന്നാണ് മഹിമ പറയുന്നത്. സഹോദരൻ നിതിൻ മൽഹോത്ര ഇൻസ്റ്റഗ്രാമിൽ പങ്കുവച്ച വിഡിയോയിലൂടെ മഹിമ തന്റെ വരവുചെലവ് കണക്കുകൾ നിരത്തിയതോടെ, പ്രവാസലോകത്തെ ജീവിതച്ചെലവുകളെക്കുറിച്ചുള്ള വലിയൊരു ചർച്ചയ്ക്കാണ് സമൂഹ മാധ്യമങ്ങളിൽ തുടക്കമായിരിക്കുന്നത്.

 

∙ കണക്കുകളിലെ കള്ളക്കളികൾ

 

രൂപയിലേക്ക് മാറ്റുമ്പോൾ കോടികൾ തോന്നിക്കുമെങ്കിലും, അമേരിക്കയിലെ ജീവിതച്ചെലവുകൾ ഡോളറിലാണ് എന്നതാണ് യാഥാർഥ്യം. മഹിമ പങ്കുവച്ച പ്രതിമാസ ബജറ്റ് പരിശോധിച്ചാൽ, ശമ്പളത്തിന്റെ സിംഹഭാഗവും അടിസ്ഥാന ആവശ്യങ്ങൾക്കായി മാത്രം ചെലവാകുന്നത് കാണാം.

 

നികുതി ഇനത്തിൽ 1,500 ഡോളർ (ഏകദേശം 1.4 ലക്ഷം രൂപ), വീടിന്റെ വായ്പ തിരിച്ചടവിന് 2,500 ഡോളർ (ഏകദേശം 2.34 ലക്ഷം രൂപ), ഭക്ഷണത്തിന് 1,000 ഡോളർ (ഏകദേശം 94,000 രൂപ), ആരോഗ്യ ഇൻഷുറൻസിന് 500 ഡോളർ (ഏകദേശം 47,000 രൂപ), കാർ ഇൻഷുറൻസിനും ഇന്ധനത്തിനും 500 ഡോളർ (ഏകദേശം 47,000 രൂപ), ഫോൺ, ഇന്റർനെറ്റ്, മറ്റ് ബില്ലുകൾ 500 ഡോളർ (ഏകദേശം 47,000 രൂപ), കുട്ടികളുടെ ചെലവുകൾ 300 ഡോളർ (ഏകദേശം 28,000 രൂപ), മറ്റ് അത്യാവശ്യങ്ങൾക്കായി (Miscellaneous) 200 ഡോളർ (ഏകദേശം 19,000 രൂപ) എന്നിങ്ങനെയാണ് ചെലവുകൾ.

 

ഇത്രയും ചെലവുകൾ കഴിഞ്ഞ് മഹിമയുടെ കയ്യിൽ മിച്ചം വരുന്നത് വെറും 1,000 ഡോളർ (ഏകദേശം 94,000 രൂപ) മാത്രമാണ്. ഇതിൽ സ്വന്തം വ്യക്തിപരമായ ചെലവുകളോ യാത്രകളോ ഒന്നും ഉൾപ്പെടുത്തിയിട്ടുമില്ല. അപ്രതീക്ഷിതമായി ഒരു ചെലവ് വന്നാൽ ഈ സമ്പാദ്യവും താളംതെറ്റും.

 

∙ ഇന്ത്യയിലെ 15 ലക്ഷവും അമേരിക്കയിലെ ഒരു കോടിയും

 

യുഎസിലേക്ക് പോകുന്നതിന് മുൻപ് ഇന്ത്യയിൽ ജോലി ചെയ്തിരുന്ന കാലത്തെക്കുറിച്ചും മഹിമ താരതമ്യം ചെയ്യുന്നുണ്ട്. ഇന്ത്യയിൽ പ്രതിവർഷം 15 ലക്ഷം രൂപയായിരുന്നു മഹിമയുടെ ശമ്പളം. യുഎസ് ശമ്പളവുമായി തട്ടിച്ചുനോക്കുമ്പോൾ ഇത് വളരെ ചെറിയ തുകയാണെങ്കിലും, ഇന്ത്യയിൽ ജീവിച്ചിരുന്നപ്പോൾ ഇതിൽ നിന്ന് നല്ലൊരു തുക സമ്പാദിക്കാൻ തനിക്ക് സാധിച്ചിരുന്നുവെന്ന് അവർ പറയുന്നു.

 

ഇവിടെയാണ് സാമ്പത്തിക ശാസ്ത്രത്തിലെ ‘പർച്ചേസിങ് പവർ പാരിറ്റി’ (വാങ്ങൽ ശേഷി) എന്ന ഘടകം പ്രസക്തമാകുന്നത്. ഒരു രാജ്യത്ത് ലഭിക്കുന്ന വരുമാനം കൊണ്ട് ആ രാജ്യത്ത് എത്രത്തോളം സാധനങ്ങളും സേവനങ്ങളും വാങ്ങാൻ സാധിക്കും എന്നതിനെ ആശ്രയിച്ചിരിക്കും ഒരാളുടെ സാമ്പത്തിക ഭദ്രത. യുഎസിൽ വീട്ടുവാടക, ആരോഗ്യ പരിരക്ഷ, സേവനങ്ങൾ എന്നിവയ്ക്ക് വലിയ തുക നൽകേണ്ടിവരുമ്പോൾ, ഇന്ത്യയിൽ താരതമ്യേന കുറഞ്ഞ ചെലവിൽ മെച്ചപ്പെട്ട ജീവിതസൗകര്യങ്ങൾ ലഭ്യമാണ്.

 

∙ സമൂഹ മാധ്യമത്തിലെ ഭിന്നാഭിപ്രായങ്ങൾ

 

മഹിമയുടെ വിഡിയോയ്ക്ക് താഴെ അനുകൂലിച്ചും പ്രതികൂലിച്ചും ഒട്ടേറെ കമന്റുകളാണ് നിറയുന്നത്. യുഎസിൽ താമസിക്കുന്ന പല പ്രവാസികളും മഹിമയുടെ വാക്കുകളെ പൂർണമായി ശരിവയ്ക്കുന്നു. “ഞങ്ങൾ ഭാര്യയും ഭർത്താവും ജോലി ചെയ്യുന്നുണ്ട്, എന്നിട്ടും മാസാവസാനം ഒന്നും മിച്ചം പിടിക്കാൻ കഴിയുന്നില്ല” എന്നാണ് ഒരു പ്രവാസി കുറിച്ചത്.

 

എന്നാൽ മറുഭാഗത്ത്, സമ്പാദ്യം മാത്രമല്ല ജീവിതനിലവാരം എന്ന വാദവും ശക്തമാണ്. “നിങ്ങൾക്ക് സ്വന്തമായി വീടും കാറുമുണ്ട്. ശുദ്ധവായുവും ശുദ്ധജലവും ലഭിക്കുന്നു. മികച്ച റോഡുകൾ, പാർക്കുകൾ, കുട്ടികൾക്കുള്ള സൗകര്യങ്ങൾ എന്നിവയെല്ലാം ആസ്വദിക്കുന്നുണ്ട്. നികുതിയായി നൽകുന്ന പണത്തിന് കൃത്യമായ അടിസ്ഥാന സൗകര്യങ്ങൾ അവിടെ തിരികെ ലഭിക്കുന്നുണ്ട്. യുഎസിലെ മിഡിൽ ക്ലാസ് ജീവിതം എന്നത് ഇതൊക്കെയാണ്” – മറ്റൊരു ഉപയോക്താവ് ചൂണ്ടിക്കാട്ടി.

 

∙ തിളക്കത്തിന് പിന്നിലെ യാഥാർഥ്യം

 

വിദേശ രാജ്യങ്ങളിലെ ശമ്പളക്കണക്കുകൾ ഇന്ത്യൻ രൂപയിലേക്ക് മാറ്റുമ്പോഴുള്ള ആകർഷണീയത പ്രവാസജീവിതത്തിന്റെ യാഥാർഥ്യമല്ലെന്ന് മഹിമയുടെ അനുഭവം ഓർമിപ്പിക്കുന്നു. മെച്ചപ്പെട്ട ജീവിതനിലവാരവും അടിസ്ഥാന സൗകര്യങ്ങളും വിദേശരാജ്യങ്ങൾ നൽകുന്നുണ്ടെന്നത് വസ്തുതയാണ്.

 

എങ്കിലും, ഉയർന്ന നികുതിയും കുതിച്ചുയരുന്ന ജീവിതച്ചെലവുകളും കാരണം, ‘കോടീശ്വരൻ’ എന്ന ലേബലിൽ ജീവിക്കുമ്പോഴും മാസാവസാനം വരവുചെലവ് കണക്കുകൾ കൂട്ടിമുട്ടിക്കാൻ പാടുപെടുന്നവരാണ് പ്രവാസികളിൽ ഭൂരിഭാഗവും. ഡോളറിന്റെ തിളക്കത്തിനപ്പുറം, ഓരോ പ്രവാസിയുടെയും ജീവിതത്തിന് പിന്നിൽ ഇത്തരമൊരു കഠിനമായ ബജറ്റ് കണക്കുകളുണ്ടെന്നതാണ് സത്യം.