ഭുവനേശ്വർ∙ വ്യത്യസ്ത പേരുകളും രേഖകളും നൽകി മൂന്ന് പാസ്പോർട്ടുകൾ സ്വന്തമാക്കിയ യുവാവ് വിമാനത്താവളത്തിൽ വച്ച് പിടിയിലായി. യുപിയിലെ അസംഗഡ് ജില്ലയില്‍ താമസിക്കുന്ന ബ്രിജേഷ് കുമാർ (34) ആണ് പാസ്പോർട്ടിൽ കൃത്രിമം കാട്ടിയതിനു ഭുവനേശ്വർ വിമാനത്താവളത്തിൽ വച്ച് അറസ്റ്റിലായത്. ഇൻഡിഗോ വിമാനത്തിൽ ബാങ്കോക്കിൽനിന്നു മടങ്ങുമ്പോഴാണ് ഇയാൾ പിടിയിലായത്. വിമാനത്താവളത്തിലെ ഇമിഗ്രേഷൻ പരിശോധനയിലാണു തട്ടിപ്പ് പുറത്തായത്.

 

പൊലീസ് നൽകുന്ന വിവരപ്രകാരം വെള്ളിയാഴ്ച രാവിലെ 11.35 നുള്ള ഇൻഡിഗോ വിമാനത്തിലാണ് ബ്രിജേഷ് കുമാർ ഭുവനേശ്വറിൽ എത്തിയത്. പരിശോധനയിൽ ഒരേ വിലാസത്തിൽ പല പേരുകളിലായി മൂന്ന് പാസ്പോർട്ട് എടുത്തിട്ടുള്ളതായി കണ്ടെത്തി. ലക്നൗവിലെ പാസ്പോർട്ട് ഓഫിസിൽനിന്നുമാണ് ഈ പാസ്പോർട്ടുകൾ നൽകിയിട്ടുള്ളത്. ദൽവീർ യാദവ്, ബ്രിജേഷ് കുമാർ, ബ്രിജേഷ് പ്രസാദ് എന്നീ പേരുകളിലായിരുന്നു യുവാവ് മൂന്ന് പാസ്പോർട്ടുകൾ സ്വന്തമാക്കിയത്.

 

ബ്രിജേഷ് കുമാറിന്റെ വിദേശ യാത്രകൾ പരിശോധിച്ചപ്പോൾ കൂടുതലും ഇയാള്‍ തായ്‌ലൻഡിലേക്കാണു യാത്ര പോയതെന്നു കണ്ടെത്തി. 2017, 2019, 2023 വർഷങ്ങളിൽ തായ്‌ലൻഡിലേക്കും മറ്റ് വിദേശ രാജ്യങ്ങളിലേക്കും ബ്രിജേഷ് യാത്ര ചെയ്തു. ഈ യാത്രകൾക്കു പല പാസ്പോർട്ടുകളാണ് ഉപയോഗിച്ചത്. രണ്ട് ഏജന്റുമാരുടെ സഹായത്തോടെ വ്യാജരേഖ ചമച്ചാണ് മൂന്ന് പാസ്പോർട്ടുകൾ സ്വന്തമാക്കിയതെന്ന് ചോദ്യം ചെയ്യലിൽ ബ്രിജേഷ് സമ്മതിച്ചു. പിടിയിലാകുമ്പോൾ പ്രതിയുടെ കയ്യിൽ നാല് മൊബൈൽ ഫോണുകൾ, തായ് കറൻസി എന്നിവ ഉണ്ടായിരുന്നു.