അമൃത്സർ∙ മദ്യപിച്ച് അമിതവേഗത്തിൽ പൊലീസുകാരനോടിച്ച കാറിടിച്ച് വിദ്യാർഥിനിക്ക് ഗുരുതര പരുക്ക്. പഞ്ചാബിലെ അമൃത്സറിൽ സ്കൂളിൽനിന്ന് തിരികെ വരികയായിരുന്ന പന്ത്രണ്ടുകാരിയാണ് അപകടത്തിൽപ്പെട്ടത്. കുട്ടി വാഹനത്തിന് അടിയിൽപ്പെട്ടെന്നും അവിടെനിന്ന് വളരെ ബുദ്ധിമുട്ടി വലിച്ചെടുക്കുകയായിരുന്നെന്നും പ്രദേശവാസികൾ പറയുന്നു. അപകടം കണ്ട് ഓടുക്കൂടിയ നാട്ടുകാരാണ് വാഹനമോടിച്ചയാളെ പിടിച്ചുകെട്ടി പൊലീസിൽ ഏൽപ്പിച്ചത്. ഇയാൾ മദ്യപിച്ചിരുന്നതായി നാട്ടുകാരും പറഞ്ഞു. അമൃത്പാൽ സിങ് എന്ന സിപിഒയാണ് വാഹനമോടിച്ചതെന്ന് ദൃക്സാക്ഷികളിൽ ഒരാൾ പറഞ്ഞു.
‘അയാൾ ആകെ ആടിക്കുഴഞ്ഞാണ് നിന്നത്, കണ്ണൊക്കെ കഷ്ടപ്പെട്ടാണ് തുറന്നത്, കൂടാതം ഛർദ്ദിക്കുകയും ചെയ്തു. കാറിൽ മദ്യക്കുപ്പികളും സിഗരറ്റും ലൈറ്ററമൊക്കെയുണ്ടായിരുന്നു’– അപകടത്തിനു പിന്നാലെ ഓടിക്കൂടിയ നാട്ടുകാരിൽ ഒരാൾ പറഞ്ഞു.
അപകടത്തിൽപ്പെട്ട കുട്ടിയുടെ വീട്ടിലെ സ്ഥിതി വളരെ മോശമാണെന്ന് കുട്ടിയുടെ ബന്ധു അറിയിച്ചു. മാതാപിതാക്കളെ നഷ്ടപ്പെട്ട പെൺകുട്ടി വാടകവീട്ടിലാണ് കഴിയുന്നത്. കുടുംബത്തിലെ പല അംഗങ്ങൾക്കും ശാരീരികമായ വൈകല്യങ്ങൾ ഉള്ളതിനാൽ വളരെ കഷ്ടപ്പെട്ടാണ് ജീവിതം മുന്നോട്ടു കൊണ്ടുപോകുന്നതെന്നും ബന്ധുവായ പ്രീതി അറിയിച്ചു. കുട്ടിക്ക് ആവശ്യമായ ചികിത്സ നൽകണമെന്നും അപകടമുണ്ടാക്കിയ പൊലീസുകാരനെതിരം ശക്തമായ നടപടി കൈക്കൊണ്ട് വിദ്യാർഥിനിക്ക് നീതി ഉറപ്പാക്കണമെന്നും അവർ ആവശ്യപ്പെട്ടു.






