ഒറ്റപ്പാലം ∙ വിശന്ന കള്ളൻ കയ്യിൽ കരുതിയിരുന്ന ഇഡ്ഡലി കഴിക്കാൻ തുടങ്ങിയതിനു പിന്നാലെ നായ കുരച്ചതോടെ മോഷണശ്രമം പാളി. പാലപ്പുറം കൊട്ടാരപ്പാട്ടിൽ ശ്രീനിവാസന്റെ വീട്ടിലായിരുന്നു മോഷണശ്രമം.

 

30ന് പുലർച്ചെ മൂന്നോടെയാണു സംഭവം. വീടിന്റെ ടെറസിൽ കയറി ഇരുന്ന് ഇഡ്ഡലി കഴിക്കാൻ ഒരുങ്ങുന്നതിനിടെയാണു നായ കുരച്ചത്. ഇതോടെ കുടുംബാംഗങ്ങൾ ഉണർന്നു ബഹളം വച്ചു. പിന്നാലെ മോഷ്ടാക്കൾ ഇറങ്ങിയോടി. കടന്നുകളയാനുള്ള ശ്രമത്തിനിടെ ടെറസിനോടു ചേർന്നുള്ള സീലിങ് തകർന്നു. ഭക്ഷണപ്പൊതി വീടിനു സമീപത്തു നിന്നു കണ്ടെത്തി.

 

മോഷ്ടാവിന്റെ ദൃശ്യങ്ങൾ വീട്ടിലെ നിരീക്ഷണ ക്യാമറയിൽ പതിഞ്ഞിട്ടുണ്ട്. ലുങ്കിയും ഷർട്ടുമാണു വേഷം. വീടിന്റെ ഗേറ്റ് തുറന്നെത്തിയയാൾ സമീപത്തുണ്ടായിരുന്ന കോണി കയറിയാണു രണ്ടാം നിലയ്ക്കു മുകളിലെ ടെറസിലെത്തിയത്. ഇവിടെ ഇഡ്ഡലിപ്പൊതി തുറന്നുവച്ചു കഴിച്ചുതുടങ്ങിയപ്പോഴാണു നായ കുരച്ചത്. ഒറ്റപ്പാലം പൊലീസ് സ്ഥലത്തെത്തി പരിശോധന നടത്തി.