പുണെ ∙ പ്രതിശ്രുത വധുവായിരുന്ന സിയ ഗോയലിനു മറ്റൊരാളുമായി ബന്ധമുണ്ടെന്നു കൊല്ലപ്പെട്ട യുവ വ്യവസായി കേതൻ അഗർവാൾ സംശയിച്ചിരുന്നതായി അന്വേഷണസംഘം വ്യക്തമാക്കി. കേതൻ കുടുംബവുമായി ഇതു പങ്കുവച്ചിരുന്നു. വിവാഹം ഉറപ്പിക്കുന്നതിനു മുൻപു സിയയുടെ പശ്ചാത്തലം വിശദമായി അന്വേഷിച്ചിരുന്നോ എന്നും മകൻ ചോദിച്ചതായും കേതന്റെ പിതാവ് വിശാൽ അഗർവാൾ പൊലീസിനോടു പറഞ്ഞു.

 

പലപ്പോഴും സിയയുടെ ഫോൺ തിരക്കിലാണെന്നും നിസ്സാര കാര്യങ്ങൾക്കു പോലും വലിയ രീതിയിൽ ദേഷ്യപ്പെടുന്നതായും കേതൻ കുടുംബാംഗങ്ങളോടു പറഞ്ഞിരുന്നു. സിയയുടെ സംസാരത്തിൽ ചേതന്റെ കാര്യം പലപ്പോഴും കയറി വരുന്നതു മകനെ അസ്വസ്ഥനാക്കിയിരുന്നെന്നും പിതാവ് വ്യക്തമാക്കി. കഴിഞ്ഞ 18നാണു സിയ ഗോയലും കാമുകൻ ചേതൻ ചൗധരിയും ചേർന്നു ലോഹ്ഗഡ് കോട്ടയിൽ നിന്നു പ്രതിശ്രുതവരൻ കേതൻ അഗർവാളിനെ കൊക്കയിലേക്കു തള്ളിയിട്ടു കൊലപ്പെടുത്തിയത്.