കാസർകോട് ∙ ആശുപത്രിയിൽനിന്നും മൃതദേഹം മാറി നൽകി. ചിറ്റാരിക്കാൽ സ്വദേശി പി.സി. തോമസ് പനച്ചിക്കൽ (86) എന്നയാളുടെ മൃതദേഹമാണ് മാറി നൽകിയത്. കണ്ണൂർ കരുവഞ്ചാലിലെ സ്വകാര്യ ആശുപത്രിയ്ക്കാണ് പിഴവ് സംഭവിച്ചത്. വാർധക്യ സഹജമായ അസുഖത്തെ തുടർന്നാണ് തോമസിനെ ആശുപത്രിയിൽ പ്രവേശിപ്പിച്ചത്. ഇന്നലെ ആശുപത്രിയിൽ വച്ച് മരിച്ചു.

 

ഇന്ന് ഉച്ചയ്ക്ക് 2.30ന് തോമാപുരം പള്ളിയിൽ സംസ്കാരം നിശ്ചയിച്ചിരുന്നു. ഉച്ചയോടെ വീട്ടിൽ‌ എത്തിച്ച മൃതദേഹം ബന്ധുക്കൾ നോക്കിയപ്പോഴാണ് മറ്റൊരാളുടേത് ആണെന്ന് മനസിലായത്. ഉടൻ ഇവർ ആശുപത്രി അധികൃതരുമായി ബന്ധപ്പെടുകയും അവർ തോമസിന്റെ മൃതദേഹം എത്തിക്കുകയുമായിരുന്നു.

 

ഇതോടെ സംസ്‌കാര ചടങ്ങുകൾ വൈകിട്ടത്തേക്ക് മാറ്റി. മോർച്ചറി ജീവനക്കാരുടെ അശ്രദ്ധയാണ് മൃതദേഹം മാറിപ്പോകാൻ കാരണമെന്നാണ് ആശുപത്രി അധികൃതർ നൽകുന്ന വിശദീകരണം.