spotnewswebsite@gmail.com
കയ്റോ∙ ഉറങ്ങിക്കിടക്കുകയായിരുന്ന പ്രായമായ ഭർത്താവിനെ സിമന്റ് കട്ട ഉപയോഗിച്ച് തലക്കടിച്ച് കൊലപ്പെടുത്തിയ 60 വയസ്സുകാരിക്ക് ഈജിപ്ഷ്യൻ ക്രിമിനൽ കോടതി വധശിക്ഷ വിധിച്ചു. ഈജിപ്തിലെ ശർഖിയ ഗവർണറേറ്റിലാണ് നാടിനെ നടുക്കിയ സംഭവം നടന്നത്.
ദാമ്പത്യ തർക്കങ്ങളെ തുടർന്നാണ് ഭർത്താവിനെ വകവരുത്താൻ തീരുമാനിച്ചതെന്ന് അന്വേഷണത്തിൽ വ്യക്തമായി. സംഭവദിവസം ഭർത്താവ് ഉറങ്ങിയെന്ന് ഉറപ്പുവരുത്തിയ ശേഷം, ഇവർ സിമന്റ് കട്ട ഉപയോഗിച്ച് തലക്കടിച്ച് കൊലപ്പെടുത്തുകയായിരുന്നു. തുടർന്ന് കുറ്റകൃത്യം മറച്ചുവെക്കാൻ ഭർത്താവിന്റെ വസ്ത്രങ്ങൾക്ക് തീകൊളുത്തി മൃതദേഹത്തിലേക്ക് എറിഞ്ഞു.
കൊലപാതകത്തിന് ശേഷം പുറത്തിറങ്ങിയ പ്രതി, അജ്ഞാതർ വീടിനുള്ളിൽ അതിക്രമിച്ചു കയറി ഭർത്താവിനെ ആക്രമിച്ച് തീകൊളുത്തിയതാണെന്ന് അയൽവാസികളെ ധരിപ്പിക്കാൻ ശ്രമിച്ചു. എന്നാൽ പൊലീസിന്റെ വിശദമായ അന്വേഷണത്തിൽ പ്രതിയുടെ കള്ളക്കളി പുറത്താവുകയായിരുന്നു.
ചോദ്യം ചെയ്യലിൽ പ്രതി കുറ്റം സമ്മതിച്ചു. ഭർത്താവിന്റെ മോശം പെരുമാറ്റവും മറ്റ് ബന്ധങ്ങളുമാണ് കൊലപാതകത്തിലേക്ക് നയിച്ചതെന്ന് ഇവർ മൊഴി നൽകി. വിചാരണ പൂർത്തിയാക്കിയ കോടതി പ്രതിക്ക് തൂക്കിക്കൊല വിധിക്കുകയായിരുന്നു. ദമ്പതികൾ മാത്രമായിരുന്നു വീട്ടിൽ താമസിച്ചിരുന്നത്.
