കൊല്ലം ∙ പരവൂരിൽ പുരുഷന്റേതെന്നു സംശയിക്കുന്ന മൃതദേഹ അവശിഷ്ടങ്ങൾ കണ്ടെത്തി. പോളിച്ചിറ പമ്പ്ഹൗസിനു സമീപത്തു നിന്നാണ് ഏകദേശം 2 മാസത്തിലേറെ പഴക്കമുള്ള മൃതദേഹ ഭാഗങ്ങൾ കണ്ടെടുത്തത്. ആൾപ്പാർപ്പില്ലാത്ത പ്രദേശമാണിത്. സമീപമുള്ള മരത്തിൽ തൂങ്ങി മരിച്ചതാണോ എന്ന് പൊലീസ് സംശയിക്കുന്നു. തലയോട്ടിയും ചില അസ്ഥികൂട ഭാഗങ്ങളുമാണ് കണ്ടെത്തിയത്.

 

മൃതദേഹ അവശിഷ്ടങ്ങൾക്കു സമീപത്തു നിന്നായി വസ്ത്ര അവശിഷ്ടങ്ങളും കണ്ടെത്തി. മൃതദേഹം ആരുടേതാണെന്നു ശാസ്ത്രീയ പരിശോധനകൾക്കു ശേഷമേ സ്ഥിരീകരിക്കാനാകൂ. പൊലീസ് കേസെടുത്ത് അന്വേഷണം ആരംഭിച്ചു. അന്വേഷണം പ്രാഥമിക ഘട്ടത്തിലാണ്.

 

പൊലീസ് പറയുന്നതു പ്രകാരം, 2 മാസം മുൻപ് ഈ പമ്പ്ഹൗസിനു സമീപത്തു നിന്നും ഉപേക്ഷിക്കപ്പെട്ട നിലയിൽ ഒരു ബൈക്ക് കണ്ടെത്തിയിരുന്നു. ചാത്തന്നൂർ പൊലീസ് റജിസ്റ്റർ ചെയ്ത പോക്സോ കേസിലെ പ്രതിയുടേതായിരുന്നു ബൈക്ക്. എന്നാൽ ഇയാളെ പിന്നീട് കണ്ടെത്താൻ സാധിച്ചില്ല. ഇപ്പോൾ കണ്ടെടുത്ത മൃതദേഹ ഭാഗങ്ങൾ ഈ പോക്സോ കേസ് പ്രതിയുടേതാണോ എന്ന് പൊലീസ് സംശയിക്കുന്നുണ്ട്.